«Нарын шуағы» әйелдер қоғамдық бірлестігінің ұйымдастыруымен білімді де жан-жақты қыз-келіншектердің арасында «TezTapQuiz» атты интеллектуалдық сайыстың финалдық кезеңі өтті. Естеріңізде болса, бірнеше апта бұрын бұл ойынның іріктеу кезеңі өтіп, 10 команданың ішінен бесеуі шешуші сайысқа жолдама алған болатын. Қатысушылар сұрақтарға тапқырлықпен тез әрі шапшаң жауап беруден бөлек, логикамен де сыналды. Екі сағатқа созылған ой жарысында 60 сауал қойылып, логикалық тапсырмалар берілді.
Осы шараға арнайы қатысқан аудандық білім беру бөлімінің бас маманы Жанаргүл Айғалиева нәзікжандылар ғана бас қосқан интелектуалдық шараның маңыздылығына тоқталып, сәтті де тартысты ойын тіледі
- Интеллектуалдық шаралардың пайдасы болмаса, зиянын көрмейтініміз анық. Күнделікті қарбаластан бір сәтке болса да арылып, ой сергіткенге не жетсін?! Алдағы уақытта да зияткерлік сайыстарға қатысып, білімдерін дәлелдеп, таным-көкжиектерін кеңейтіп, уақыттарын тиімді өткізуге ұмтылған жандардың қатары көбейсін, - деді.
Айта кетелік, қатысушылар «Оңай олжа», «Логик тайм», «Айқас» атты кезеңдерде бақ сынады. Әр кезең түрліше өрбіді. Сайыс басталғаннан қамшы салдырмаған командалар орта кезеңге келгенде бәсеңдеп қалса, қарсыласының қателігін пайдаланып, ұпайын еселеген командалар да болды.
Жүзден жүйрік шығар жарысқанда демекші, М-С.Бабажанов мектебінің атынан сынға түскен «Ұлағат» командасы, нақтырақ айтқанда Гүлзат Бисенғалиева мен Бұлбұл Құбаевалар «TezTapQuiz» атты интеллектуалдық сайыстың жеңімпазы атанып, арнайы статуэтканы иеленді. Жүлделі екінші орыннан аудандық кітапхананың намысын қорғаған «Тұмар» тобының өкілдері Гүлмира Ғайсина мен Гүлзат Молдағалиевар көрінсе, аудандық мәдениет үйінің атынан шыққан «Сырғалым»-ның қыздары Ақбота Ұзақбай мен Қырмызы Төлегеновалар үздік үштікті түйіндеді.
Аудандық балалар-жасөспірімдер туризмі және экология орталығынан «Шұғыла» және аудандық саз мектебінен сайысқа түскен «Қазына» командалары белсенділік танытқаны үшін алғысхаттарға ие болды. Айта кетелік, жүлдегер атанған барлық командаларға бағалы сыйлықтар табыс етілді.
Нұрай Таубай
Бөкей ордасы ауданы
