Тасқала аудандық полиция бөлімінің ұйымдастыруымен, ардагерлер кеңесінің қолдауымен Ұлы Отан соғысы және ішкі істер органының ардагері болған марқұм Жұмабек Габдуловтың 100 жылдығына орай полиция қызметкерлері мен ардагерлер арасында шахматтан еске алу турнирі өтті.
Жұмабек Габдулов 1924 жылы 17 желтоқсан айында Тайпақ ауданының Базартөбе ауылында дүниеге келген. 19 жасында №13 қосалқы атқыштар бригадасының полк мектебін, №2 Астрахан жаяу әскері училищесін бітірген.
1945-1946 жылдары №1039 атқыштар полкасында, №223 атқыштар дивизиясында взвод командирі, №376 күшетші атқыштар полкісінде, №124 күзетші атқыштар дивизиясында взвод командирі болған. 1947 жылы Батыс Қазақстан облысы Зеленов ауданының Железнов ауылында дене тәрбиесі мұғалімі болып қызмет атқарған.
Содан соң Зеленов және Шыңғырлау аудандық ішкі істер бөлімінде және Батыс Қазақстан облыстық паспорт столында абыройлы еңбек еткен. ССРО ішкі істер органының Ташкент милияциясы мектебін бітіргеннен кейін, Орал қаласы милиция бөлімшесінің бастығы лауазымында үш жыл қызмет жасаған. Төрт жыл облыстық ішкі істер бөлімінде қызмет еткен.
ОБХСС-те опер қызметкері, 1961 жылы Москвадағы ішкі істер органының жоғары мектебін бітіргеннен кейін 1961-1967 жылдары Казталов аудандық ішкі істер бөлімінің басшылық қызметінде болып, 1967-1978 жылдары Камен ауданының ішкі істер бөлімінің басшы лауазымын атқарған. Ол тұрғындар арасында тәртіпке қатал, бірақ, үлкен адамгершілік қасиетімен есте қалған жан.
Турнирдің негізгі мақсаты – салауатты өмір салтын насихаттай отырып Ұлы Отан соғысы және ІІО ардагері Жұмабек Габдуловтың ерлігін еске алып, оның еңбек жолын жас полиция қызметкерлеріне насихаттау болатын. Шараға ішкі істер органының ардагерлері мен Тасқала аудандық полиция бөлімінің қызметкерлері, марқұмның тума-туыстары қатысты.
Турнир қорытындысы бойынша І орынды ІІО ардагері Калихан Бақтыбаев жеңіп алса, ІІ орын ІІО ардагері Құрманғазы Алхамұлына бұйырды.
Ал жүлделі ІІІ орынды ІІО ардагері Оразбай Алтаев иеленді. Шара барысында жеңімпаздарға арнайы сыйлықтар мен алғысхаттар табысталды.
Назерке Шайхолла
Тасқала ауданы
