Бөкей ордасы ауданы бойынша толықтай модернизациядан өткен үш жаңа кітапхана ашылды.
Сайқын, Бисен және Хан ордасында жарық көрген кітапханалардың ашылуына «Тана» қоғамдық қорының жоба менеджері Динара Сейтқалиева, Жұбан Молдағалиев атындағы облыстық орталық әмбебап ғылыми кітапхана директоры Шолпан Оразаева және БҚО зағип және нашар көретін азаматтарға арналған арнаулы кітапхананың директоры Марфуға Айтқалиева арнайы келіп қатысты.
Аталмыш жұмыстар «Ауыл кітапханаларын модернизациялау» жобасы аясында іске асқан. Ал жоба үйлестіруші және бастапқы идея авторы «Тана» қоғамдық қоры болып табылса, жүзеге асыруға БҚО әкімдігі және «Қазақстан халқына» қоғамдық қоры атсалысқан.
Кітапхананың ашылу салтанаты барысында аудан басшысы Нұрлыбек Даумов және аудандық мәдениет, тілдер дамыту, дене шынықтыру және спорт бөлімінің басшысы Данагүл Ғайноллина сөз сөйлеп, арнайы келген қонақтарға қош келдің сөздерімен қатар алғысын жеткізді.
Модернизациядан өткен кітапхана білім беру аймағы, музыкалық бөлім, шығармашылық шеберхана кеңестігі, IT аумағы және жас шахматшылар аймағынан құралған. Ал жобаның жалпы сомасы 26 миллионнан астам болып табылады екен.
Еркебұлан Рахметолла
Бөкей ордасы ауданы
