Қазіргі қоғамның даму қарқыны жастарға жаңа талаптар қойып отыр. Бүгінгі студент – ертеңгі білікті маман ғана емес, елдің әлеуметтік, мәдени және экономикалық дамуына үлес қосатын саналы азамат. Сондықтан жоғары оқу орнының басты міндеті тек сапалы білім берумен шектелмейді. Университет қабырғасында кәсіби құзыреттілікпен қатар адамгершілік құндылықтар, азаматтық жауапкершілік, патриоттық сана және өмірлік ұстаным қалыптасады. Бұл тәрбиенің басты миссиясы.
Тәрбие – тұлғаның рухани әлемін байытып, оның өмірлік бағдарын айқындайтын маңызды үдеріс. Білім адамның ойын дамытса, тәрбие оның жүрегін тәрбиелейді. Осы екеуі үйлесім тапқанда ғана қоғамға пайдасын тигізетін, кәсібіне адал, еліне жанашыр, өз ісіне жауапты азамат қалыптасады.
Бүгінгі студент ақпараттың шексіз кеңістігінде өмір сүріп жатыр. Цифрлық технологиялардың дамуы, әлеуметтік желілердің ықпалы, жаһандану үдерісі жастардың дүниетанымына күн сайын әсер етуде. Осындай кезеңде ұлттық құндылықтарды сақтау, мәдени мұраны құрметтеу, академиялық адалдықты ұстану, құқықтық мәдениет пен жауапкершілікті қалыптастыру бұрынғыдан да өзекті.
Университеттегі тәрбие жұмысы тек іс-шаралар ұйымдастыру емес. Бұл студенттің жан-жақты дамуына жағдай жасау, оның шығармашылық әлеуетін ашу, көшбасшылық қабілетін жетілдіру, еріктілік қызметке, ғылыми ізденіске, спорт пен мәдени өмірге белсенді қатысуына қолдау көрсету. Осындай ортада өскен жас өзіне сенімді, қоғамға бейім және өмірлік мақсаты айқын тұлға болып қалыптасады.
Әсіресе академиялық адалдық пен азаматтық жауапкершілікке тәрбиелеудің маңызы зор. Өз еңбегін бағалайтын, әділдік қағидатын ұстанатын, қоғамдық мүддені жеке пайдадан жоғары қоятын жас – елдің ең үлкен байлығы. Сондықтан тәрбиенің әрбір бағыты студенттің бойында осы қасиеттерді дамытуға бағытталуы тиіс.
Ұлы ойшыл Әбу Насыр әл-Фараби: «Тәрбиесіз берілген білім – адамзаттың қас жауы» деген еді. Бұл сөздің мәні уақыт өткен сайын тереңдей түсуде. Себебі білімді, бірақ адамгершілік қағидаттарын ұстанбайтын маман қоғамға пайдадан гөрі зиян келтіруі мүмкін. Ал тәрбиесі мен білімі ұштасқан тұлға қай салада еңбек етсе де, өз ісінің кәсіби маманы әрі елінің сенімді азаматы болады.
Бүгінгі университет – тек білім ордасы ғана емес, тұлға қалыптастыратын үлкен әлеуметтік орта. Мұнда оқытушылар мен қызметкерлердің, ата-ананың және студенттердің бірлескен еңбегі нәтижесінде ізгілікке, жауапкершілікке, еңбексүйгіштікке және отансүйгіштікке негізделген орта қалыптасады. Осындай құндылықтар жастардың өмірлік ұстанымына айналғанда ғана біз бәсекеге қабілетті, рухы биік, ел болашағына жауапкершілікпен қарайтын жаңа буынды тәрбиелей аламыз.
Тәрбие – бір күннің немесе бір іс-шараның нәтижесі емес. Ол үздіксіз жалғасатын, жүрек пен санаға әсер ететін ұзақ үдеріс. Сондықтан әрбір студенттің бойынан ізгілік, адалдық, еңбекқорлық пен жауапкершілік қасиеттерін дамыту – баршамыздың ортақ міндетіміз. Өйткені тұлғаның қалыптасуы – мемлекеттің болашағына салынған ең маңызды инвестиция.
Бибигуль Сарбалина
Политехникалық институт директорының ТЖЖ орынбасары,
техника ғылымдарының кандидаты
