«Атамекен» концерт залында Ғ.Құрманғалиев атындағы облыстық академиялық филармониясының МАУСЫМАШАР концерті өтті.
Облыстық академиялық филармонияның 60 жылдық мерейтойына арналған маусымашар концертінің шымылдығы Дәулеткерейдің «Көроғлы» күйімен түрілді. Концертте ұжымның жыл басынан бүгінгі күнде дейінгі атқарылған жұмыстары жайында Ақпарат және жарнамалық қамтамасыз ету бөлімі арнайы дайындаған бейнефильм көрсетілді.
Мекеме басшысы Бауыржан Халиолла концертке жиналған көрерменге «қош келдіңіз!» айтып, 29-30 қыркүйекте Дәстүрлі ән айтудағы жаһандық көрсеткішті жаңартуға арналған ауқымды жоба өтетіндігін айтты. Бауыржан Ергенұлы жобаға Бас демеуші болғалы отырған Халық Банктің Батыс Қазақстан облыстық филиалының директоры Жасұлан Жұмабековтің додаға қатысатын қос дәстүрлі әншілер Хатимолла Бердіғалиев пен Қайрат Кәкімовке автокөлік мінгізетінін баса айтып, жиылған жұртшылыққа сүйінші жаңалықты жеткізді.
Бүгінгі кеште дәстүрлі, классикалық, эстрадалық әндер, танымал қазақ күйлері мен шетелдік әуендер секілді жанрлар қамтылды.
Ғ.Құрманғалиев атындағы облыстық академиялық филармониясының әртістері мен ұжымдары өнер көрсеткен маусымашар концертте көрерменнің ықыласы ерекше болды.
Концерттің соңында облыс әкімінің атынан филармония ұжымына ықылас гүлі ұсынылды.
