Қазақстанда жіті респираторлық вирустық инфекциялармен (ЖРВИ) сырқаттанушылық деңгейінің төмендегені байқалады, деп хабарлайды ҚР Денсаулық сақтау министрлігі.
Фото: DenMinPR
Қазан айының соңғы аптасында елімізде 74 689 ЖРВИ жағдайы тіркелді. Бұл көрсеткіш өткен эпидемиологиялық маусымның сәйкес кезеңімен салыстырғанда 44%-ға, ал алдыңғы аптамен салыстырғанда 1,5 есе аз. Жалпы маусым басталғалы бері 1 075 450 жағдай тіркеліп отыр.
Зертханалық мониторинг нәтижелері айналымдағы тұмауға жатпайтын вирустардың ішінде риновирустар, аденовирустар мен бокавирустар басым екенін көрсетті. Маусым басталғалы бері А(H1N1)pdm09 тұмауының 12 жағдайы зертханалық тұрғыдан расталды.
Қазіргі уақытта республика өңірлерінде тұмауға қарсы вакцинациялау жұмыстары жүйелі түрде жүргізілуде. Халықты қамту үшін «Гриппол®» вакцинасының 2,2 млн дозасы сатып алынды. Қараша айының басындағы мәлімет бойынша, 1 670 447 адам егіліп, тиісті контингенттің 75,3%-ы қамтылды.
