«ҚазАгроҚаржы» АҚ ауыл шаруашылығы техникасын жеңілдікпен лизингке алу бойынша «Өз жемі-шөбіміз», «6% жеңілдетілген лизинг» және «Қазақстанда жасалған» бағдарламаларына өтінім қабылдауды қайта бастады. Бұл туралы ҚР Ауыл шаруашылығы министрлігі жазды.
«Өз жемі-шөбіміз» бағдарламасы
Бағдарлама мал шаруашылығын жем-шөп базасымен қамтамасыз етуге, ауыл шаруашылығы жануарларының өнімділігін арттыруға және мал шаруашылығы өнімінің көлемін ұлғайтуға бағытталған. Бағдарлама бойынша қазақстандық және шетелдік өндірістегі ауыл шаруашылығы техникасын, жем-шөп дайындау техникасын және жылжымалы суару жүйелерін сатып алуға болады.
Сыйақы мөлшерлемесі жылдық 6%, лизинг мерзімі 10 жылға дейін, алғашқы жарна кемінде 15%.
Бағдарлама биологиялық активтерді өсірумен, күтіп-бағумен немесе бордақылаумен айналысатын, жер учаскелерінің құрылымында жайылымдары және (немесе) шабындықтары бар және жем өндіруді немесе дайындауды құжатпен растай алатын ауыл шаруашылығы тауар өндірушілеріне арналған. Лизингалушы үшін қарсы міндеттеме белгіленген: қаржыландыру алынған қаржы жылынан кейінгі екі жыл ішінде еңбекақы қорын және салықтық түсімдерді 10%-ға арттыру.
«Жеңілдікті лизинг 6%»
Бағдарлама отандық өндірістегі және құрастырудағы өздігінен жүретін ауыл шаруашылығы техникасын жеңілдікті жағдайда қаржылық лизингке беруді көздейді. Фермерлер техниканы алғашқы жарнасыз, 10 жылға дейінгі мерзімге, жылдық 6% мөлшерлемемен сатып ала алады.
«Қазақстанда жасалған»
Бұл бағдарлама бойынша аграршылар ілмелі, тіркемелі және өздігінен жүретін ауыл шаруашылығы техникасын, сондай-ақ ауыл шаруашылығы және балық өнімдерін, биологиялық активтерді тасымалдауға арналған көлік құралдарын сатып ала алады. Бағдарлама шарты: техника отандық өндірісте жасалған немесе құрастырылған болуы тиіс. Мөлшерлеме жылдық 6%, мерзімі 10 жылға дейін, алғашқы жарна лизинг нысаны құнының кемінде 15%-ы.
