Бүгін Өзбекстанның Ташкент қаласында өткен самбодан жастар және жасөспірімдер арасында әлем чемпионатының жеңімпазы атанған Ерасыл Шерниязұлы Бақытты және жаттықтырушысы Бірлес Есенғалиевті Жаңақала ауданы әкімі Наурызбай Қарағойшин бастаған Жаңақала жұртшылығы зор ілтипатпен қарсы алып, құрмет көрсетті.
Ерасыл Бақытты елдің кіреберіс қақпасынан қарсы алған аудан басшысы палуанды жарқын жеңісімен құттықтап, ізгі тілегін арнады.
Елдің мерейін асырған, ұлтының абыройын асқақтатқан, жерлестерінің мақтанышына айналған, бейбіт елдің батыры Ерасыл Шерниязұлына деген құрмет одан әрі аудандық мәдени-демалыс орталығында жалғасты. Ерасылды қарсылауға келген жерлестерінің қарасы көп болды.
Аудандық мәдени-демалыс орталығының фойесінде Ерасыл жайында дайындаған орталық кітапхана ұжымының кітап көрмесі ұсынылды. Ұзамай самбодан әлем чемпионы Ерасыл Бақытқа арналған кездесу кеші басталды. Кеш барысында Ерасылдың құлын ғұмырынан сыр шертетін әсерлі де мағыналы бейнеүзік көрсетілді. Бейнероликте балалық шағы, спортқа келу жолы, үлкен спортқа қадам басуы, бозкілемдегі жанкештілігі секілді жан тебірентер сәттер жан-жақты баяндалған.
Кездесу кешінде аудан әкімі Н.Қадырбайұлы құттықтау сөз сөйледі.
- Ерасылдың есімі Жаңақала ауданының тарихына алтын әріптермен жазылады. Өйткені ол Жаңақаладан шыққан тұңғыш әлем чемпионы. Ерасыл, айналайын жеңісің құтты болсын! Біз сенімен мақтанамыз. Әлі де алар асуың көп, бағындырар белесің мол болғай! - деді. Мұнан кейін аудан әкімі Ерасылдың анасы Балғаным апайға, облыстық самбо федерациясының атқарушы директоры Рустам Шайхиев пен бапкері Бірлес Есенғалиевке алғыс хат табыс етті. Ал палуан Ерасылға алғыс хат және 1 000 000 теңге сыйақы берілді.
Кездесуде облыстық спорт басқармасының басшысы Әсия Аманбаева, бапкері Бірлес Есенғалиев Ерасыл тек бір ауданның емес, бүкіл қазақтың мақтанышы екенін айтып, спортшыға лайықты құрмет көрсеткен аудан басшылығына алғыстарын жеткізді.
Кеш соңында Ерасыл өзін төбесіне көтерген халқына, облыстық спорт басқармасына, аудан әкімдігіне шынайы ризашылығын білдірді.
Дәл осы күні аудан әкімі Наурызбай Қадырбайұлы Достық алаңында Ерасыл Бақыт мен бапкері Бірлес Есенғалиевке Жаңақала жұртшылығының атынан ат мінгізді.
Алтынбек Ермекқалиев
Жаңақала ауданы
zhaikpress.kz
Батыс Қазақстанның маңызды жаңалықтарын біздің Instagram-дағы парақшамыздан және Telegram арнамыздан алғашқы болып біліңіздер
