Достық үйінде мемлекет және қоғам қайраткері Мұстақым Ықсановтың туғанына 95 жыл толуына орай «Із қалдырған дара тұлға» атты еске алу кеші өтті.
Мұстақым Біләлұлы саналы ғұмырында өшпес із қалдырған, Жайық өңірінің әлеуметтік-экономикалық әлеуетін көтеріп, мәдениетін өркендетуде елеулі еңбек етті. Абзал азаматтың сүбелі еңбегі – кейінгі ұрпаққа үлгі болса, бүгінгі ел тізгінін ұстаған азаматтар үшін аманат. Қайраткерді еске алу кешінде көрерменге ұсынылған бейнебаянға оның жүріп өткен жолы, сан салада атқарған нәтижелі жұмысы арқау болды.
– Халқымыз әрдайым өткенге салауат айтып, келешекке аманат жүгін қалдырған. Сондықтан ел өз тарихында әрдайым асылдарын ардақтап, тұлғаларын ұлықтай білген. Өткенді бағалай білу – өнегелі ұрпақтың ісі. Елдіктің белгісі. Өздеріңіз білетіндей, Мұстақым Біләлұлы Ықсановтың 95 жылдығына орай өтіп жатқан іс-шаралардың барлығы – сан жылдар өтсе де қоғам қайраткерінің ерлігі және есімі ел аузында екенінің айқын дәлелі. «Адам мәңгі жасамайды, мәңгі жасайтын оның ісі» дегендей, нар тұлға – ең алдымен табанды еңбегімен, табиғат тарту еткен талантымен және ерекше мінезімен ел аузында, ел есінде қалған жан. Мұстақым Біләлұлы Сыр өңірінде 36 жасында ел басқарған. Еліміздің түкпір-түкпірінде және біздің өңірде басшылық еткен оның батыл қадамдары мен асыл мұрасын насихаттау – біздің парызымын, ізін жалғастыру – міндетіміз, – деді облыс әкімінің орынбасары Бақытжан Нарымбетов.
Еске алу кеші барысында «Ықсанов – біртуар жан, асқақ тұлға» атты жоғары сынып оқушылары мен колледж студенттері арасында өткен ғылыми-тәжірбиелік конференциясының және мемлекеттік қызметкерлер мен мекемелер арасында баскетболдан өткен Орал қаласы біріншілігінің жүлдегер-жеңімпаздары марапатталды.
Ясипа Рабаева,
zhaikpress.kz
