Қазақстан Еуразиядағы маңызды энергетикалық және логистикалық орталық ретіндегі позициясын сенімді түрде нығайтып келеді. Бұл үдерісте Ресей Федерациясымен газ саласындағы ынтымақтастық екі мемлекет арасындағы стратегиялық макроэкономикалық әріптестіктің негізгі бағыттарының бірі болып қала береді. Бұл туралы ҚР Энергетика министрлігі жазды.
Бүгінде көрші елдердің өзара іс-қимылы ресми декларациялар шеңберінен әлдеқайда асып түсті. Бірлескен жұмыс инфрақұрылымның үздіксіз жұмысын қамтамасыз етуді, көмірсутектерді өңдеу көлемін арттыруды және экспорттық-транзиттік қуаттарды жүйелі түрде кеңейтуді қамтиды. Қазақстан бұл мүмкіндіктерді өңірлік жеткізілім қауіпсіздігін қамтамасыз ету мақсатында дәйекті түрде қолдап келеді.
Ынтымақтастықтың негізгі басымдығы газ тасымалдау желісін жаңғыртуға бағытталған. Географиялық орналасуы мен техникалық дайындығы Қазақстанға ресейлік табиғи газды Өзбекстан мен Қырғызстан нарықтарына транзиттеуде маңызды рөл атқаруға мүмкіндік береді. Сонымен қатар, бұл көлік дәлізі Ресей Федерациясына кері бағыттағы газ транзитін де табысты қамтамасыз етуде. Осындай көпвекторлы бағыт отандық құбырларды құрлықтағы аса маңызды энергетикалық артериялардың біріне айналдырып отыр.
Әріптестіктің тағы бір стратегиялық әрі тарихи тұрғыдан тиімді бағыты — Қазақстанның Қарашығанақ кен орнынан алынатын шикі газды Ресейдегі Орынбор газ өңдеу зауытында өңдеу. Көпжылдық ынтымақтастық өндірістік және экономикалық кооперацияның тұрақты үлгісіне айналды. Технологиялық қуаттарды өзара пайдалану екі ел экономикасына да тікелей тиімділік әкеліп, газ саласының сапалы дамуына ықпал етуде.
Сенімді логистикалық бағыттарды дамыту және инфрақұрылымды кезең-кезеңімен жаңғырту — Қазақстанның сөзсіз басымдығы. Мұндай прагматикалық тәсіл экономикаға қосымша табыс тартуға, Орталық Азия мемлекеттерінің экономикалық байланысын күшейтуге және іс жүзінде республика базасында сенімді құрлықтық газ хабын қалыптастыруға мүмкіндік береді.
