Жасанды интеллект және цифрлық даму министрлігі баспасөз қызметінің хабарлауынша, Қазақстан экономиканың негізгі секторларына жасанды интеллект технологияларын енгізе отырып, цифрлық трансформацияны жеделдетуде.
Фото: istockphoto.com
Еліміз мемлекеттік басқару мен бизнеспен өзара іс-қимылдың негізі ретінде AI-First архитектурасына көшуді таңдады. Қазіргі таңда өнеркәсіп, энергетика, денсаулық сақтау мен білім беру сияқты 72 саланы қамтитын цифрлық трансформацияның 20 картасы бекітілді. Бұл бюрократияны жеңілдетіп, кәсіпкерлердің шығындарын азайтуға жол ашады.
Жоспар бойынша қоғам игілігі үшін 50-ден астам ЖИ-агент қалыптасады. Мысалы, денсаулық сақтау саласына енгізілген «Cerebra AI» инсультті ерте диагностикалау жүйесі өлім-жітім көрсеткішін 40%-ға төмендетсе, ЖИ-терапевт ондаған клиникада дәрігерлерге көмектесуде. Кәсіпкерлікті қолдау мақсатында бәсекелестікті талдайтын және алғашқы кезеңде операциялық шығындарды екі есе қысқартатын ЖИ-көмекші іске қосылды. Сондай-ақ тәулік бойы жұмыс істейтін салықтық ЖИ-ассистент пен «Бәйтерек» холдингімен бірлескен қаржыландыру өтінімдерін сүйемелдеу көмекшісі жұмыс істеп тұр.
Алдағы уақытта ақпараттық қауіпсіздікті нығайту үшін алаяқтық қоңырауларды тұтынушы жауап бергенге дейін бұғаттайтын антифрод-жүйелер енгізілмек. Бұған қоса, мемлекеттік қызметшілерге күнделікті жұмысты автоматтандыру үшін өз бетінше ЖИ-агенттер жасауға мүмкіндік беретін Vibe Coding тәжірибесі оқытылуда. Бұл экожүйені дамыту — проактивті сервистік мемлекет үлгісіне көшуге бағытталған ұлттық стратегияның негізгі бөлігі.
