ҚР Мәдениет және ақпарат министрлігінің баспасөз қызметі 1 шілдеден бастап Қазақстанда үкіметтік емес ұйымдарға (ҮЕҰ) арналған жыл сайынғы сыйлықақы беру байқауына өтінім қабылдау басталғанын хабарлайды.
Байқаудың басты мақсаты — үкіметтік емес ұйымдардың әлеуетін нығайту және қоғамдық маңызы бар жобаларды іске асыруға ынталандыру үшін институционалдық қолдау көрсету болып табылады. Сыйлықақы әлеуметтік маңызы бар 16 сала бойынша беріледі және оның әрқайсысына тағайындалған сыйақы мөлшері 2000 АЕК-ті құрайды. Кейінгі тоғыз жыл ішінде бұл марапат 558 ұйымға табысталды, олардың қатарында ауылдық елді мекендердің дамуына үлес қосып жүрген белсенді бірлестіктер де бар.
Байқау ұйымдастырушылары қоғамдық бастамаларды жүзеге асыруға белсенді қатысып, әлеуметтік мәселелерді шешуге үлес қосып жүрген барлық үкіметтік емес ұйымды бақ сынауға шақырады. Өтінімдерді қабылдау 2026 жылғы 1 қыркүйекте сағат 18:30-да (Астана уақытымен) аяқталады. Байқауға қатысу талаптары туралы толық ақпаратты министрліктің ресми gov.kz сайтынан білуге болады, ал қосымша сұрақтар бойынша 8 (7172) 74-07-41, 74-09-97, 74-02-17 телефон нөмірлері арқылы хабарласуға мүмкіндік бар.
