Орал қаласындағы Назарбаев Зияткерлік мектебі оқудың алғашқы күндерінен-ақ оқушылардың жобалық және ғылыми-зерттеу жұмыстарымен айналысу мүмкіндігі үшін жаратылыстану пәндеріне деген қызығушылығын оятуды мақсат етеді. Жаңа зертханада балалар алған білімдерін тәжірибеде қолдана отырып, жобалар мен прототиптер жасайтын болады.

Зертхана 3D принтер және сканер, лазерлік станок, интерактивті және техникалық құралдар жиынтығымен жабдықталған коворкинг, шеберхана және шығармашылық үш аймақты қамтиды. Арнайы элективті курс аясында оқушылар инженерлік іс, математика, физика, химия, биология бағыттарын оқиды, сонымен қатар бағдарламалау және робототехникамен айналысады.

– Оқушылардың NIS-ENGINEERING аймақтарында алған білімдері мен күрделі жабдықтарда жұмыс істеудің бірегей тәжірибесі дәстүрлі оқу үдерісінен шығуға және олардың білімді дайын түрде қабылдауға емес, сыни тұрғыдан ойлауға және жаңа білім іздеуге бағытталған қабілеттерін дамытуға мүмкіндік береді, – дейді мектеп директоры Айдарбек Айтпукешев.

Зертхананың ашылуында мектеп оқушылары пневмонияның бар-жоғын анықтауға көмектесетін жасанды интеллект өнімі, ауа тазартқыш, ауылшаруашылық дроны, күнделікті ұйқыдан тұрғаныңыз үшін ақша төлейтін оятқыш, ақылды жылыжай, ұнтақ тәрізді заттардың тығыздығын анықтайтын құрылғы жобаларын таныстырды. Жас зерттеушілерге жергілікті жоғары оқу орындарының оқытушылары мен қалалық мектептердің мұғалімдері өз пікірілері мен ұсыныстарын білдірді.
Болашақта Оралдағы NIS STEM білім беруді насихаттау және енгізу алаңына айналуды жоспарлап отыр. Қазір мектеп тренерлері қала мектептерінің мұғалімдеріне көшпелі шеберлік сабақтарын ұйымдастыруда.

Айдана Хамидуллина,
Орал қаласындағы Назарбаев Зияткерлік мектебінің баспасөз хатшысы