Дәл қазір Оралдағы «Тұңғыш Президент» алаңында Ұлыстың ұлы күні – Наурыз мейрамы тойлануда.

- Құрметті жерлестер! Баршаңызды Ұлыстың ұлы күні – әз Наурыз мейрамымен шын жүректен құттықтаймын! Бүгін күн мен түннің теңеліп, табиғаттың қайта жаңғыратын сәтінде Ұлыстың Ұлы күні – Әз Наурыз мейрамы басталды. Бұл халқымыз үшін ырысты, ынтымақты ұлы той.

Наурыз – табиғаттың жаңғыруын, ауызбіршілік пен жақсылықты бейнелейді. Ел ішінде «Наурыз бата», «Наурыз тілек», «Наурыз той», «Наурыз төл» деген керемет тіркестер бар. Қазақ халқының кең пейілін дәріптей түсетін осындай жоралғылар мейрамның мән-мағынасын айшықтай түседі.
Ежелден жасампаздықтың нышаны ретінде құрметтелген бұл мейрам - бір шаңырақ астында ынтымақта өмір сүріп жатқан халқымыздың асыға күтетін ең қастерлі де сүйікті мерекелерінің бірі.
Күллі Шығыс жұртына ортақ мереке – Наурыздың тарихы  тым тереңде жатыр. Ырысы мол мереке біздің жан дүниемізді шуаққа бөлейді, ой-ниетімізді жақсылыққа бағыттайды. Бұл - кешірім мен мейірімнің, үміт пен сенімнің, ізгілік пен түсіністіктің мерекесі.

Мемлекет басшысы Қасым-Жомарт Тоқаевтың қазақстандықтарды Көрісу күнімен құттықтауы Наурыз мейрамының бастауы саналатын еліміздің батыс өңіріне тән ежелгі дәстүріміздің дәрежесін арттырды.

Ел ынтымағын еселеуде Наурыз мейрамының алатын орны да ерекше. Еліміздегі барлық ұлттың бірлігін бекемдеп, ынтымағын ту еткен Наурыз мерекесін жаңғырудың бастамасы деп қабылдаймыз. Сонымен бірге, Наурыз мерекесімен қатар қасиетті Рамазан айы тұспа-тұс келіп отыр. Осы ретте, Ораза ұстауға ниет еткен барша жамағатқа дұға-тілектеріңіз қабыл болсын дегім келеді.

Осындай ұлық мереке күні Ақ Жайық өңірін адал еңбегімен құтты қонысқа айналдырған барша жерлестердің кемел келешек жолындағы бастамалары баянды, еңбектері жемісті бола бергей!,  - деді өз құттықтауында облыс әкімі.

zhaikpress.kz