Бүгін Орал қаласында «Біз – жеңіс мұрагерлеріміз» атты акция басталды.
Ұлы жеңістің 75 жылдығына орай өткен акция аясында 1-ақпаннан бастап 31 желтоқсанға дейін күн сайын сағат 12.00-де қалада орналасқан ескерткіштерге гүл шоқтарын қою рәсімі өтпек.
Майдангерлер рухына тағзым ету рәсімі «Бауырластар» зиратынан басталды. 1942 жылы Сталинград үшін шайқаста Орал қаласы Сталинград майданының аймағына қосылды.
Қалада ашылған госпитальға жарақат алғандарды қабылдап, орналастыруға жергілікті тұрғындар жұмылдырылған. Қалалық зиратта 1942-1943 жылдары қайтыс болған Сталинград қорғаушыларының бауырлас бейіті орналасқан. 1950 жылы суретші В.Большаковтың жобасымен бауырластар бейітіне ескерткіш орнатылды. Ескерткішке: "1941-1945 жж. біздің Отанымыздың бостандығы мен тәуелсіздігі үшін ұрыста қаза болғандарға мәңгілік даңқ" деген жазу жазылған. Одан әрі гүл қою рәсімі «Үш батыр қыз», маршал Г.Жуков, Кеңес одағының батыры Т.Масин, Жеңіс алаңындағы «Мәңгілік алау» маңында жалғасты.
Ескеркіш жанына жиналған Ұлы отан соғысының ардагерлері, жастар, қоғамдық ұйымдардың өкілдері гүл шоқтарын қойып майдангерлер рухына тағзым жасады. Бір минут үнсіздікпен басталған тағылымды шарада Ұлы Отан соғысының ардагерлері сөз алып, бүгіннен басталған акцияның өскелең ұрпақ үшін тәлімі мол екендігін атап өтті. Қаламыздағы жоғары, орта оқу орындарының студенттері акцияға белсене қатысты.
Гүлжамал Жолдығали
Эльвира Меңдіғали
zhaikpress.kz
