Бүгін Қазақстан Республикасы Көлік министрілігі Автомобиль көлігі және көліктік бақылау комитетінің Батыс Қазақстан облысы бойынша көліктік бақылау инспекциясымен 9-11 сынып оқушыларына кәсіптік бағдар беру бағытында «Көлік әлемі: Болашақ сіздің қолыңызда!» тақырыбында ашық есік күні ұйымдастырылды.
Шараға қала мектептерінің жоғары сынып оқушылары, көлік ұйымдары: «Қазаэронавигация» РМК Орал филиалының Әуе қозғалысы қызметі, «Қазақстан темір жолы – Жүк тасымалы» ЖШС-нің «Батыс» филиалы, М.Мәметова атындағы «Орал «Халықаралық аэропорты» ЖШС, «КазАвтоЖол» ҰҚ АҚ БҚО филиалы, «Жол активтер сапасының ұлттық орталығы» РМК БҚО филиалы, «Қазақстан су жолдары» РМҚК Орал-Каспий филиалы, «Батыс Қазақстан автобус паркі» ЖШС автобекеті, «KREISS ASIA» ЖШС, салалық жоғары оқу орындары мен колледж өкілдері қатысып, қажетті ақпарат берді.
Кездесу шеңберінде көліктің әртүрлі салаларында: авиация, теміржол, су және автомобиль көлігінде жұмыс істеу үшін мамандар даярлауға көмектесетін мемлекет бөлетін оқыту гранттары, оқыту бағдарламаларына қатысты мәселелер қозғалды.
Сондай-ақ, көлік саласының сарапшылары кездесуде қатысушылар осы саладағы мамандықтар мен қызметі туралы қызықты және танымдық әңгімелерімен бөлісті.
Мектеп оқушылары пікір алмасып, өздерін қызықтырған мамандықтар бойынша толыққанды ақпарат алды.
Батыс Қазақстан облысы бойынша
көліктік бақылау инспекциясы
