Бүгін Жәңгір хан атындағы Батыс Қазақстан аграрлық-техникалық университетінде батыс өңіріндегі жоғары оқу орындары ректорларының кеңесі өтті.
Басты мақсат – Мемлекет басшысының Жолдауын және 2023-2029 жылдарға арналған ҚР-ның жоғары білімді және ғылымды дамыту тұжырымдамасын жүзеге асыру, кеңестің белсенді жұмысын жандандыру.
Кеңестің алғашқы көшпелі отырысының Оралдағы алпыс жылдық тарихы бар Жәңгір хан университетінде ұйымдастырылуының басты себебі – білім ордасының тарихи датасымен байланысты. Сондықтан да алдымен Жәңгір хан университетінің басқарма төрағасы-ректор Асқар Наметов қонақтарға ыстық ықыласын білдіріп, мерейтойлық естелік сыйлықтар табыстады. Өз кезегінде жоғары оқу орындарының басшылары да жылы лебіздерін жеткізіп, алпыс жылдық белесті артта қалдырған университет ұжымын құттықтады.
Бұдан әрі батыс өңіріндегі ЖОО ректорлары кеңесінің төрайымы, С.Өтебаев атындағы Атырау мұнай және газ университетінің ректоры Гүлзада Шакуликова сөз алып:
– Біз бүгінгі алғашқы жиында белгілі бір мәселелерді талқылай отырып, алға ортақ мақсат-міндеттер қоямыз. Келесі басқосуымызда сол жұмыстардың жүзеге асырылу барысымен танысатын боламыз, – деді.
Оқу орындары басшылары Қазақстанның батыс өңірлерінде индустриалды ғылымды дамыту, ғылыми коллаборация, мегагранттарға бірлесе қатысу, өңір экономикасын дамытудағы ЖОО-ның ғылыми-техникалық әлеуеті секілді мәселелерді бірлесе талқылады. Талқылау және тәжірибе алмасу кезінде университеттердегі ауқымды тәжірибелік, инновациялық бағыттар, заманауи технологиялар, жаңа жобалар назардан тыс қалмады. Өңірлік жоғары оқу орындары ректорлары Жәңгір хан университетінің ғылыми әлеуеті жоғары екенін айта келе, бірқатар ғылыми жобаларға қызығушылық танытып, алдағы уақытта жобаларды коммерцияландыру бағытында бірлесе жұмыстануға ұсыныс білдірді.
Х.Досмұхамедов атындағы Атырау университетінің ректоры Саламат Идрисов ауыл шаруашылығы, су шаруашылығы бойынша ғылыми жобаларды БҚАТУ ғалымдарымен бірлесе жасақтау, ауыл шаруашылығы мамандарын даярлау бағытында бірге жұмыстану жөнінде ой-пікірімен бөлісті. Ал Қ.Жұбанов атындағы Ақтөбе өңірлік университетінің ректоры Лаура Қарабасова әр білім ордасының өзіндік ерекшеліктері бар екенін, мұндай жетістіктерді басшылар ғана емес, ғалымдар да көруі қажеттігін алға тартты. Яғни, алдағы уақытта өзара тәжірибе алмасу жұмыстарын күшейту керек деген ойын жеткізді.
Кеңес төрайымы Гүлзада Тәңірбергенқызы батыстағы төрт өңірді біріктіріп, бір ғылыми жоба жасау жөнінде ой тастады. – Биыл 13 желтоқсанда біздің университетімізде климаттық диалог форматында халықаралық конференция өткізгелі жатырмыз. Біріккен ұлттар ұйымының өкілдері жиналып, су мәселесін талқылайды. Университет қабырғасында БҰҰ-ның түрлі мақсаттары бойынша 17 клуб құрдық. Осы жиынға өз университеттеріңізден мамандар жіберіп, қатыстыруыңызға болады. Осындай іс-тәжірибелерді өзара алмасып отырғанымыз дұрыс, – деді С.Өтебаев атындағы Атырау мұнай және газ университетінің ректоры Г.Шакуликова.
Сонымен қатар М.Өтемісов атындағы БҚУ ректоры Нұрлан Серғалиев те, кеңес жұмысына қашықтықтан ZOOM платформасы арқылы Ақтау қаласынан қатысқан Ш.Есенов атындағы Каспий технологиялар және инжиниринг университетінің ректоры Бақытжан Ахметов те өзара тәжірибе алмасу бағытындағы ой-пікірлерін айтты.
Жиын соңында алғашқы кеңес отырысын ұйымдастырған Жәңгір хан атындағы БҚАТУ басшылығына өзге оқу орындарының ректорлары өз алғыстарын білдірді. Тараптар бұл бастама өзара күш біріктіруге, ғылыми жаңалықтар ашуға септігін тигізеріне сенім білдірді.
Қатысушылар батыс өңіріндегі ЖОО ректорларының кеңесін тоқсан сайын ұйымдастыру туралы ортақ шешімге келді. Кеңестің келесі көшпелі отырысы 2024 жылдың қаңтар айында өтетін болды.
БҚАТУ медиа орталығы
