Облыс әкімі Нариман Төреғалиев ардагер журналист, өлкетанушы Тихон Әліпқалиды 80 жасқа толуына орай қабылдады.
Кездесуде өңір басшысы ел ағасын 80 жасқа толған мерейтойымен құттықтап, өлке тарихы мен әдебиетін және мәдениетін дамытудағы еселі еңбегі үшін алғыс айтты.
– Сіз еліміздегі келелі мәселе мен қоғамдағы оқиғаларды жүрек сүзгісінен өткізіп, шығармашылығыңызға арқау еттіңіз. Қоғамдық істерге белсене араласа жүріп, қасиетті Ақ Жайықтың рухани-мәдени тұрғыда өркендеуіне қомақты үлес қостыңыз. Сіздің «Мәңгілікке маздаған қыршын ғұмыр», «Тозақта өксіген тағдыр» сияқты кітаптарыңызды қалың оқырман жылы қабылдады, – деді Нариман Төреғалиұлы.
Өз кезегінде Тихон Әліпқалиұлы рухани мәдениет, қоғамдық сананы кемелдендіру, жас ұрпақтың бойына ізгілік пен отаншылдық сезімін сіңіру хақында әңгімеледі. Кездесуде өңір басшысы мерейтой иесіне шығармашылық шабыт пен зор денсаулық тілеп, иығына шапан жапты.
Батыс Қазақстан облысы әкімінің
жұртшылықпен байланыс қызметі
