30 маусым және 1 шілде күндері ауданымыздағы Кеңтүбек ауылдық округіне қарасты Пролетарка ауылында «Әкелер Даңқы Жолымен» атты дәстүрлі аудандық спорттық-туристік слет өтті.
Спорттық-туристік слеттің басты мақсаты салауатты өмір салтын ұстанып, аудан жастарына экологиялық тәрбие беруде туризмнің рөлін арттыру. Ұйымдастырушы аудандық дене шынықтыру және спорт бөлімі мен «Ақсай» мәдени-бұқаралық, ұлттық ат спорт кешені. Жарыстың бас төрешісі «Ақсай» мәдени-бұқаралық, ұлттық ат спорт кешенінің директоры Бауыржан Мухтубаев.
Жарыс дала газеті, тұратын орын, су туризмі, спорттық бағдарлау, туристтік өткелдер, саябақ волейбол, шағын футбол, гір көтеру, дойбы, арқан тарту, тоғызқұмалақ, қазақ күресі, қол күресі және асық ату мен бес асықтан тұрды. Сайысқа барлығы 13 ауылдық округ қатысты.
Екі күнге созылған слет барысында қатысушылар табиғат аясында, ашық аспан астында шатырларын құрып, түрлі спорттық және шығармашылық байқаулар бойынша жарысты.
Қорытындысында, жалпы командалық есепте 403 ұпаймен Бөрлі ауылдық округінің командасы топ жарып, жеңімпаз атанды. 338 ұпаймен Кеңтүбек ауылдық округ командасы екінші орынға жайғасты. Ал 336 ұпаймен Қарағанды ауылдық округ командасы үштікті қорытындылады.
Жеңімпаздар мен жүлдегерлер аудандық дене шынықтыру және спорт бөлімінің «Ақсай» мәдени-бұқаралық, ұлттық ат спорт кешенінің тиісті дәрежелі дипломдарымен, медальдарымен және сыйлықтарымен марапатталды.
Айдана Абдрахманова,
Бөрлі ауданы
zhaikpress.kz
