Дәл осындай атаумен Теректі аудандық кітапханасында аудандық мәдени-демалыс орталығының ұйымдастыруымен дөңгелек үстел өтті.
Тағылымды шараға халықтық «Шежіре» әжелер ансамблінің мүшелері, көпбалалы, отбасы мен мамандықты арқалап, ел ісіне араласып жүрген ұстаз, кәсіпкер, іскер аналар қатысты. Аудан әкімінің орынбасары Қалаубек Теміров арнайы шақыртылған қонақтарға лебізін білдірді.
- Қазақстан Республикасындағы мереке күндерінің тізбегіне тағы бір ерекше күн енді. Ол өздеріңіздей асыл аналарымызға арналады. Аналар күнімен құттықтай отырып, дендеріңізге саулық, жанұяларыңызға бақыт тілеймін. Әлемнің бастауы – аналар! Сіздердің арқаларыңызда біз адам болдық. Оны ешқашан ұмытпаймыз. Аудан әкімдігі атынан құттықтаймын. Ұрпақ қызығына бөленіп, ортамызда аман жүріңіздер,- деді Қалаубек Баубекұлы өз сөзінде.
Мамыр айының екінші жексенбісінде тойланатын Аналар күніне арналған дөңгелек үстелде «Дат» театры жанынан құрылған балалар үйірмесінің оқушылары жүректі тебірентер өлеңдер оқып, аналардың көзіне жас үйірді. Асыл жандарға аппақ тілектерін ән арқылы жеткізген «Өркен» балалар вокалдық ансамблі «Ана» әнін шырқады. Сағидолла Ізделеевтің орындауындағы «Анашым» әнін қосыла шырқап, іс-шараның шырайын кіргізді. Жүргізушінің тосыннан қойған сұрақтарына мүдірмей жауап берген аналар өмірлік тәжірибелерімен бөлісті. Балаларының бойындағы ең жақсы қасиеттерді, аналары туралы естеліктерді, жұмыс пен тәрбиені алыпжүрудің сырларын айтты.
Сұрақтар оларды толқытып, жан-жақты қырлары ашылды. Ауданымызда осындай жандардың бары қуантты. Неге десеңіздер, барлық тіршілік аналардан тарайды. Өскелең ұрпақтың қоғамда рөлі бар, еліне пайдасы тиер азамат болғанын шын жүрегімен қалайтын олардан өнеге жиған бала жаман болмайды. Дөңгелек үстел соңында трениң өткізілді. Қонақтар берілген жемістердің біреуін таңдап, «Мен қандай анамын?» сұрағына көтеріңкі көңіл күймен жауап берді.
Ұйымдастырушылар тарапынан алғыс айтылып, естелік сыйлықтар табысталды.
Ақтілек Әлібекұлы,
Теректі ауданы
