Бүгін теректіліктер әз-Наурызды дүркіретіп атап өтті. «Ұлыстың қадам басқан ұлы күні» атты мерекелік іс-шараға халық тайлы-тұяғы қалмай жиылды.
Қыстан аман шығып, бір-бірімен көріскен жұртшылық орталық алаңға тігілген киіз үйлерге бас сұғып, наурыз көжеден дәм татып, арқа-жарқа болды.
Бүлдіршіндер Наурыздың басталғанын хабарлаған соң, ортаға Наурыз гүлі мен бір топ қыз-жігіттер шығып, композициялық би қойылымын орындады. Қойылымда ұлттық ойындарымызды шебер көрсеткен өнерпаздар жерлестерінің ыстық ықыласына бөленді. Одан кейін термешілер тереңнен толғап, Қыдыр ата бата беріп, Жер ана халқымыздың ғұрпы бойынша адыраспанмен аластау ырымын жасады. Осы сәтте шашу шашылып, халықтық «Шежіре» ансамблі «Тойбазар» әнін айтса, үлгілі «Жұлдыз» би ансамблі мың бұрала «Қара жорға» биін биледі.
Мәдени-демалыс орталығы өнерпаздарының өнерін тамашалап, көтеріңкі көңіл-күймен отырған жұртшылықты Теректі ауданының әкімі Тілек Габдушев құттықтады. Содан соң көктемгі су тасқынында белсенділік танытқан ұжымдарды алғысхатпен марапаттады. Аудан басшысының алғысына бөленгендер қатарында Теректі ауылындағы №12 өрт сөндіру бөлімі, Ақжайықтағы №25 өрт сөндіру бекеті, Теректі аудандық мәдени-демалыс орталығы, Теректі ауылдық округі әкімі аппараты, аудандық кәсіпкерлік және ауыл шаруашылығы бөлімдерінің ұжымы мен Нұрболат Бисекенов бар.
Марапаттау рәсімінен кейін ат үстінде көк туды желбіреткен шеру ерекше мақтаныш сезімін оятты. Күміс көмей әншілер әсем әндерді әуелетіп, бишілер билеген мерекелік концерт соңы ұлттық ойындардан сайыспен жалғасын тапты.
Аягөз Айтқалиева,
Теректі ауданы
zhaikpress.kz
22.03.2023, 20:15
22.03.2023, 16:11
22.03.2023, 15:40
18.03.2023, 23:20
