Шыңғырлау ауданында аудан кәсіпкерлері, ауылдық округтер әкімдері мен жеке кәсіпкерлер қатысқан жиын өтті.
Жиынға аудан басшысы Мұрат Өмірәлиев, облыс әкімінің кеңесшісі Алдияр Халелов, «Aqjaiyq» АҚ ӘКК-ның басқарма төрағасының орынбасары Қазбек Ұзықанов және «Aqjaiyq» АҚ ӘКК-ның баспасөз хатшысы Ляззат Садирова қатысты.
Жиналыста былтыр алғашқы жұмысын бастаған «Ауыл аманаты» жобасының биылғы өзгерістері, жалпы жобаның тиімділігі мен ауылшаруашылық кооперативтерін құрудың артықшылықтары, сондай- ақ алдағы жоспарлар бағдарлама аясында тағы қандай мүмкіндіктер беретіні туралы айтылды.
Аудан бойынша былтыр 75 адам 489 миллион теңге көлемінде несие алды. Бұл несие 2,5 пайызбен «Aqjaiyq» АҚ Әлеуметтік кәсіпкерлік корпарациясы арқылы беріліп және бұл несиелердің басым бөлігі сүтті тұқымды ірі қара малын алуға жұмсалған болатын.
Бүгінде несие алған тұрғындар жоба талабы бойынша аналық сүтті тұқымды мал басын әкеп, бағып жатыр. Аудан кәсіпкерлері, несие алғандар мен несие алуға талаптанып жүрген тұрғындар жоба бағытында және кооперативтер құру бағытында сұрақтар қойып, нақты жауап алды.
Қаршыға Елемесов,
Шыңғырлау ауданы
zhaikpress.kz
