Бөрлі ауданында «Aksai trail run» жүгіру марафоны өтті. Ауданға қарасты Ақбұлақ ауылдық округі маңындағы «Алғабас» жоталарында ұйымдастырылған желаяқтар жарысын Бөрлі ауданы әкімдігі, аудандық дене шынықтыру және спорт бөлімі мен «Uralsk runnеrs» жүгірушілер клубы ұйымдастырды.
Ел Тәуелсіздігінің 30 жылдығы мен Ақсай қаласының күніне орайластырылған бәсекеге өңіріміздің барлық аудандары мен Ақтөбе облысының спортшылары қатысты.
Мықтының мықтысы ғана шыдай алатын биік жоталарды бағындыруға бағытталған жарыс тартысты өтті. Ерлер мен бұрымдылар түрлі қашықтықта сынға түсіп, мықтыны анықтады. Жеңіл атлетика спорты қарыштап дамып жатқан Бәйтерек ауданының спортшылары да аталмыш додада бой көрсетті. Нәтижелері де көңіл қуантады.
Алдымен 200 метр биіктікке көтерілу жарысына шыққан қыздар арасында Ақкенже Таубаева екінші орын иеленсе, 4,5 шақырым қашықтыққа жүгірген қыздар бәсекесінде Надежда Беспалова алдына жан салмай, бірінші орын иеленді. Одан бөлек 200 метр биіктікке жарысқан ерлер бәсекесінде Бахтияр Исимов екінші нәтиже көрсетті. Сондай-ақ 4,5 шақырым жолды бағындырған ерлер бәсекесінде тағы бір бәйтеректік спортшы Ақылбек Қабдолмәжит бірінші орын иеленді.
Алғабас жоталарындағы жарыс расымен де қызыққа толы болды. Ең мықты деген спортшылар таулы жерде 8,9 шақырымға жүгірді. Аталмыш жолды бағындырған қыздар арасында январцевтық Виктория Глотова үшінші, Наталья Панова екінші орынды иеленді.
Барлық жеңімпаздар мен жүлдегерлерге ақшалай сыйлықтар мен арнайы медальдар табысталды.
Түгелбай Бисен,
Бәйтерек ауданы
zhaikpress.kz
суреттер «Бөрлі спорты» Facebook парақшасынан алынды
