Бөкей ордасы аудандық мәдениет үйінде 1 мамыр – Қазақстан халқының бірлігі күніне орай «Ынтымақ керуені» атты мерекелік концерт өтті.
Әнұранымызбен шымылдығы түрілген шара аудан басшысы Нұрлыбек Даумовтың құттықтауымен жалғасты.
- Мамыр мерекесінің мән-маңызы бөлек. Бұл мерекеде еліміздің барлық тұрғындарының ынтымақтастығы мен достығының, бейбіт өмірінің жарқын көрінісі дәріптеледі.
«Дамудың сыры – бірлікте, табыстың сыры – тірлікте» дейді дана халқымыз. Ауызбіршілік пен түсіністік, қарапайым сыйластық үстемдік құрған жерде ғана нәтижелі істердің болатыны белгілі.
Бүгінде бөкейліктердің бірлігі мен татулықты ту еткен ынтымағы – ұрпаққа үлгі, болашаққа өнеге. Бейбітшілік пен татулық, жұдырықтай жұмылған бірлік бізді бұдан да жарқын, баянды болашаққа бастайды. Баршаңызды айтулы мерекемен шын жүректен құттықтай отырып, отбасыларыңызға құт-береке, мол бақыт тілеймін!- деді аудан әкімі өз сөзінде.
Бұл концерттің ерекшелігі сол, сахнада мәдениет үйінің қызметкерлері ғана емес, ақхалатты дәрігерлер мен бала оқытқан мұғалімдер бастап, кітапхана сияқты үлкенді-кішілі мекеме ұжымдары да түрлі ұлттың өнері мен мәдениетін паш етті.
Мекеме қызметкерлері түрлі тілде ән салып, би биледі.
Татулық пен ынтымақты дәріптеген бұл концерттің көптің көңілінен шыққаны даусыз.
Анар Артықбай
Суретке түсірген автор
Бөкей ордасы ауданы
