Бөкей ордасы аудандық орталықтандырылған кітапханалар жүйесі ұжымының ұйымдастыруымен Ұлттық кітап күніне арналған ерекше жиын өтті. Бұл мереке кезекті науқанның бірі емес, зиялылық пен парасат салтанат құрған мереке болды. "Кітап оқу - ұлттың рухани тірегі" деген атпен өткен шараға мемлекеттік қызметшілер пен полиция қызметкерлері, оқушылар мен ұстаздар, зейнеткерлер мен кітапханашылар, жалпы кітапсүйер қауым қатысты.
Мәдени шараның шымылдығы аудандық ішкі саясат бөлімінің басшысы Исатай Құрмашевтың құттықтау сөзімен түрілді. М.С.Бабажанов атындағы мектеп директоры Фархат Мұқатов та кітапхана ұжымын кәсіби мерекелерімен құттықтап, рухани ағарту саласындағы еңбектеріне табыс тілеп, сыйлығын тарту етті.
Кеш кітап дефилесімен, "Оқу, талаптан!" флешмобымен жалғасып, библиомикс шараларына ұласты. Шараға жиналған үлкен-кіші интеллектуалды ойындарға белсене қатысып, арнайы сый-сияпаттарға ие болды.
Анар Артықбай,
суретке түсірген Әділет Абдиров
Бөкей ордасы ауданы
