17.05.2024, 17:29
Оқылды: 8

Бөрлі ауданының бас балуаны анықталды

Астана күні мерекесіне орайластырылған «Қазақстан барысы» қазақ күресінің аудандық іріктеу турнирі Бөрлі ауданында да өтті. Ұлттық қазақ күресін бұқара арасында кеңінен насихаттап, дамыту мақсатында ұйымдастырылған турнир ауданымызда 2011 жылдан бері өткізіліп келеді.

441244934_3834455403546359_5704482616515219454_n

 

 

Қазақ спортын, оның ішінде ұлттық күресті насихаттауға бағытталған бірегей жоба елдің көңілінен шығып, сүйікті жарысына айналды. Кім мықтыны анықтаған сайыста өңірдегі сайдың тасындай тізілген 27 балуан қатысты. «Күш атасын танымас» деген балуандар өзара мықтыны анықтап, айласы мен әдісі, бабы мен бағы келіскен қатысушылар финалда белдесті.

442476540_3834463443545555_3150438527643620379_n

 

90 келі салмақ дәрежесіне дейінгі балуандар «Өгіз балуаны» атағын иемдену үшін белдесіп, нәтижесінде бірінші орынды Қанай ауылдық округі атынан, "Табын" лақап атымен шыққан, ауданымыздың мақтанышы Әділбек Сейісов, екінші орынды "Сұңқар" лақап атымен шыққан Ақсай қалалық №1 ЖББОМ мұғалімі Ақылбек Қабдулмажит, ал үшінші орынды "Шеркеш" лақап атымен шыққан аудандық полиция бөлімінің қызметкері Айдос Сатқанов еншіледі.

441411844_3834466340211932_6878976075555224957_n

 

Делебені қоздырып, көңіл көрігін қыздырған белдесулер «Түйе балуан» атағы үшін күрескен балуандардың арасында өтті. Нәтижесінде бірінші орынды және Бөкейорда ауданында өтетін облыстық жарысқа жолдаманы "Тана сұлтаны", Ақсай қалалық №3 ЖББОМ мұғалімі Замир Хамзин жеңіп алса, екінші орын турнирдің ең жас балуаны "Қалқаман тана" лақап атымен шыққан, қанайлық Есбол Сағындыққа бұйырды. Ал бұл үштікті Ақсайдың "Қарақұнаны" Аңсар Қабылтай қорытындылады.

442468065_3834465780211988_7261475634631398732_n

 

Жарысқа төрешілік еткен І дәрежелі төреші Досбол Кеңесов болса, турнирдің бас төрешісі Ақтілек Ғапаров болды. Ал балуандардың жетістіктері мен аяқалысын көрерменге жеткізіп, шараның жоғары дәрежеде өтуіне ықпал еткен Серік Қалимолла болды. Ауданымыздың намысын облыста қорғайтын Замир Хамзинге жеңіс тілейміз!

441229800_3834467166878516_6092338361584953490_n

Айым Нұрғалиева,

Бөрлі ауданы,

zhaikpress.kz

Узнайте первым о важных новостях Западного Казахстана на нашей странице
в Instagram и нашем Telegram - канале