Бүгін Қаратөбе ауданының орталығында бір пәтерлі тұрғын үймен біріктірілген учаскелік полицияның тірек пунктінің ашылу салтанаты өтті.
Пайдаланылуға берілгелі отырған су жаңа нысанның ашылу салтанатында сөз сөйлеген аудан әкімі Қадыржан Сүйеуғалиев:
– Мемлекет басшысының жыл сайынғы Жолдауларындағы тапсырмаларға сай түрлі елді мекендерде құқық қорғау органдарына жергілікті атқарушы орындар тарапынан көмектер көрсетіліп келеді. Соның бір дәлелі - «АMANAT» партиясы филиалының сайлауалды бағдарламасының жоспарына сай бүгінгі ашылғалы отырған учаскелік полицияның тірек пункті. Қаратөбе ауылдық округі төрт елді мекеннен тұрады. Тірек пунктінің орталықтан ашылуы құқық қорғау органдары жұмысының жоғары деңгейде жүруіне үлкен серпін тигізеді деп есептейміз, - деді.
Жаңа ғимараттың ашылуымен аудан тұрғындарын құттықтаған БҚО Полиция департаменті жергілікті полиция қызметі бастығының орынбасары, полиция подполковнигі Ернар Сұлтанғалиев пен полиция ардагері Серік Ғалымов бір пәтерлі тұрғын үймен біріктірілген учаскелік полицияның тірек пункті халық тыныштығы мен құқығын қорғауда ауқымды жұмыстар атқаратындығына сенім білдіріп, бұл жоба облыс аудандары арасында жүзеге асырылып жатқан алғашқы жоба екендігіне тоқталып өтті.
Халық игілігіне берілгелі тұрған жаңа нысанның ашылу салтанатының лента қию рәсімін аудан әкімі Қадыржан Орынбасарұлы пен БҚО Полиция департаменті жергілікті полиция қызметі бастығының орынбасары, полиция подполковнигі Ернар Тимурұлы жүргізді.
Айта кетейік, бір пәтерлі тұрғын үймен біріктірілген учаскелік полицияның тірек пунктінің құрылысы биылғы сәуір айында басталып, тамыз айының соңында аяқталған болатын. Құрылыс жұмыстарын «БатысКотлоМонтаж» компаниясы жүргізген нысанға аудандық бюджеттен 39 миллион 500 мың теңге қаржы жұмсалған.
Серікбай Хасанов,
Қаратөбе ауданы
zhaikpress.kz
