Кәсіпкерлік субъектілері елдің тұрақты экономикалық дамуын қамтамасыз етуге елеулі үлес қосуда.
Бизнесті қорғау әрқашан прокурорлық қадағалаудың басты бағыттарының бірі болып табылады.
Мемлекет кәсіпкерлік қызмет еркіндігі құқығына кепілдік береді. Президент Жолдауларында бизнесті дамыту, салықтық әкімшілендіруді оңайлату, бақылау-қадағалау функцияларын тексеру мәселелері әрдайым басты бағдар ретінде көрсетеді. Шағын кәсіпкерлікті қолдау және дамыту мақсатында 2019 жылғы желтоқсанда елімізде тексеру жүргізуге мораторий енгізілді.
Бас прокуратура "Атамекен" Ұлттық Кәсіпкерлер палатасымен бірлесіп Кәсіпкерлік қызмет саласындағы заңдылық пен құқықтық тәртіпті нығайту, проблемаларды уақтылы анықтау және шешу үшін "Бизнесті қорғау жөніндегі 2021 жылға арналған Жол картасы" әзірленді.
Жедел әрекет ету үшін аудан прокуратурасында кәсіпкерлердің құқықтарын қорғау бойынша мобильді топ жұмыс істейді. Оның құрамына барлық мүдделі органдар тартылды.
Әр түрлі әкімшілік кедергілерді анықтау үшін мемлекеттік органдардың нормативтік құқықтық актілері мен құқық қолдану практикасына тұрақты негізде мониторинг жүргізіледі. Анықталған жағдайда прокурорлық ден қою актілері енгізіледі, заңнамалық актілерге толықтырулар мен өзгерістер енгізуге бастама жасалады.
Мысалы, ағымдағы жылы аудан прокуратурасы микрокәсіпкерлік субъектісін заңсыз тексеру және әкімшілік жауапкершілікке тарту фактісін анықтады. Қабылданған ден қою шараларымен тексеру заңсыз деп танылды, әкімшілік жаза жойылды.
Мемлекеттік сатып алу бойынша заңсыз конкурстардың күшін жою жолымен 11 кәсіпкердің адал бәсекелестікке құқығы қалпына келтірілді.
Сотқа дейінгі тергеу басталғаннан бастап сот актілері шығарылғанға және заңды күшіне енгенге дейін қылмыстық шеңберге тартылған кәсіпкерлердің құқықтарын қамтамасыз ету мәселелері тұрақты бақылауда.
Кәсіпкерлік субъектілерінің құқықтық сауаттылығын қамтамасыз ету мақсатында құқықтық түсіндіру жұмыстары жүргізілуде.
Ағымдағы жылдың басынан бері Атамекен палатасының алаңында 2 кездесу өткізілді. Кәсіпкерлік кодекс нормалары түсіндірілді, кеңестер берілді.
Аудан әкімдігімен, Мемлекеттік кірістер басқармасымен, "Атамекен" палатасымен бірлесіп кәсіпкерлерге арналған дөңгелек үстел ұйымдастырылды.
Несиелеу, әкімшілік кедергілер және басқа да өзекті мәселелер талқыланды.
Осы бағыттағы жұмыстар жалғасуда.
Алмас Унаев,
Бөрлі ауданы прокурорының орынбасары
