Қазақстан Республикасы Мемлекеттік қызмет істері агенттігінің Батыс Қазақстан облысы бойынша департаментінің ұйымдастыруымен Казталов ауданында мемлекеттік қызметшілерге арналған тәжірибелік форматтағы оқыту іс-шарасы өтті. Сыбайлас жемқорлыққа қарсы заңнаманың талаптарын нақты қызметтік жағдайлар арқылы түсіндіріп, мемлекеттік қызметшілердің құқықтық сауаттылығын арттыру мақсатында өткен іс-шараға Департамент басшысы Мұрат Байсалов, аудан әкімі Асланбек Сарқұлов, ауылдық аудандық дербес бөлімдердің басшылары мен ауылдық округ әкімдері қатысты.
Кездесу барысында күнделікті қызметте кездесуі мүмкін жағдайлар негізінде әзірленген кейстік жағдайлар талқыланды. Қатысушылар әрбір жағдайды жан-жақты саралап, сыбайлас жемқорлыққа қарсы шектеулерді сақтау, қызметтік әдеп қағидаларын орындау, мүдделер қақтығысының алдын алу және заң талаптарын тәжірибеде дұрыс қолдану мәселелері бойынша өз пікірлерін ортаға салды.
Практикалық мысалдар арқылы мемлекеттік қызметте орын алуы ықтимал тәуекелдерге құқықтық баға беріліп, оларды болдырмаудың тиімді тетіктері түсіндірілді.
Әдемі Жасұланқызы
Казталов ауданы
