Жәнібек ауданына Парламент Мәжілісінің депутаты Мәлік Құлшар келіп, Жәнібек ауылында бой түзеп жатқан бірқатар құрылыс нысандарын аралады. Мәжіліс депутаты алдымен 160 көрерменге арналған дене шынықтыру және сауықтыру кешенінің құрылысымен танысты. Кешеннің құрылысы 2019 жылы басталды. Қазіргі таңда аумақты абаттандыру, ішкі әрлеу жұмыстары жүруде. Нысан биыл тамыз айының аяғында қолданысқа берілмек. Құрылыс жұмыстарын «Наурыз СКФ» ЖШС жүргізуде.
Одан соң Мәлік Иманқұлұлы аудан орталығында салынып жатқан екі қабатты 12 пәтерлік екі тұрғын үйге атбасын тіреді. Нысан ішін аралап, ондағы жұмысшылармен тілдесіп қайтты. Құрылыс 2020 жылы «Нұрлы жер» бағдарламасы бойынша басталған. Мердігер болып «ЭнергоРемСервис» ЖШС танылды. Құрылыс құны 281 млн. теңгені құрайды. Нысан тамыз айының аяғында пайдалануға беріледі деп күтілуде.
Құрылыс жұмыстарымен танысып шыққан ҚР Парламенті Мәжілісінің депутаты Мәлік Құлшар аудан әкімдігінде аудан ардагерлерімен кездесу өткізді. Кездесу барысында аудандық ардагерлер кеңесінің төрағасы Амангелді Уәлиев халық қалаулысына қош келдің айтып, ауыл ақсақалдарымен жүздесіп жатқанына алғысын білдірді.
Бұдан кейін Тау ауылдық округіне келген Мәлік Иманқұлұлы Қайрат ауылдық кеңесінің төрайымы қызметін атқарған, 1972-1982 жылдары ауылдағы саябақтың негізін қалаған Ару Смайыловаға арналған тақтайшаның ашылу салтанатына қатысты.
Сонымен қатар саябақта Ұлы Отан соғысына қатысқан майдангерлердің тізімі жазылған тақтайша, жазғы сахна жаңғыртылуда. Субұрқақ жөнделіп, аллея салынып жатыр. Осынау салтанатты шараның құрметті қонағы болған Мәлік Құлшар барша ауыл тұрғындарына жылы лебізін жеткізді.
- Бейбіт күнге жетуіміз – аға буынның еңбегі, маңдай тері, қасық қанының арқасы. Ендігі үміт – жастарда. Аталарымыз салып кеткен сара жолмен жүретін де, елдің болашағын қалыптастыратын да келешек ұрпақ, - деп Мәжіліс депутаты өзінің жастардан зор үміт күтетінін айтты.
Шара соңында Тау ауылының тұрғыны Төлепқали Азберген ақсақал келген қонақтарға ақ батасын беріп, сапарларына сәттілік тіледі.
Бақытжан Серіков,
Жәнібек ауданы
zhaikpress.kz
