Казталов ауданына қарасты Талдықұдық ауылында бала-шағасымен бірге кітаптар мен газет-журналдарды жиі оқып, ұрпағын рухани азық алуға тәрбиелеп жүрген отбасы бар.

Олар – Нұрсұлтановтар отбасы. Бұл жөнінде С.Есетов атындағы ЖОББМ-ның Facebook әлеуметтік желісіндегі парақшасы арқылы хабардар болдық.

Ерлі-зайыпты Бауырбек Нұрсұлтанов пен Нұргүл Сәнкібаева жергілікті мектеп кітапханасының қорындағы көркем әдебиеттерді, жыр-дастандарды жиі оқып отырады. Әке мен ананың рухани әлемге деген құштарлығы балаларына дарып, кітапқа құмарлықтары артқан. С.Есетов атындағы мектептің 8 сынып оқушысы Бекнұр Үмбет пен 6 сынып оқушысы Жанаман Үмбет мектептердегі іс-шаралардан қапы қалмай, демалыс уақыттарын да тиімді пайдаланды. Мәселен, қысқы демалыс уақытында Бекнұр Бердібек Соқпақбаевтың «Балалық шаққа саяхатын», «Менің атым Қожасын» оқып шыққан.

-Өзім көркемсөз, мәнерлеп оқуға бейіммін. Болашақта әртіс те болғым келеді. Ол үшін тіл байлықтың да мол болуы маңызды ғой. Сондықтан бос уақытымда мектеп кітапханасынан кітаптар алып, қала берді мерзімді басылымдарды да оқып отырамын. Отбасымызбен бірге басымыз қосылған кезде оқығанымды ортаға салып, ой бөлісуді әдетке айналдырдық. Уақыт өте келе «Артық білім кітапта» екендігіне көзім жетті, - дейді Бекнұр Бауырбекұлы.

Асылбек Нәсіпқали,

Казталов ауданы

zhaikpress.kz