Аудандық Мемлекеттік кірістер басқармасы, полиция бөлімі, тұрғын үй-коммуналдық шаруашылық, жолаушылар көлігі және автомобиль жолдары бөлімі, Жымпиты ауылдық округі әкімдігі аудан орталығынан Орал қаласына шыға берісте рейд жүргізді. Олар Орал қаласына жолаушы тасымалдайтын такси көлігінің құжаты, салығы, техникалық қауіпсіздік жағдайын тексерді.
Орал қаласына жолақы 1500 теңгеден 2000 теңгеге көтерілгені халықтың наразылығын тудыруда. 2000 теңгелік такси құнына сай қызмет көрсетуі тиіс. Мемлекеттік кірістер басқармасына заңды түрде тіркеліп, билет құнын кассалық аппаратпен соғып, түбіртекті әрбір жолаушының қолына ұстатуы тиіс. Түскен табысынан мемлекетке салық төлеуге міндетті. Мемлекеттік кірістер басқармасы жол бойында такси көлігін осы бағытта тексерді.
Аудандық полиция бөлімі көліктің ұзақ жолға жарамдылығын, дөңгелегінің сапасын, өрт сөндіргіш құралы мен дәрі-дәрмек қобдишасын, қауіпсіздік белдігін қарады. Жолаушылардың өмір қауіпсіздігіне қатысты нәрсенің бәріне жіті көңіл бөлді.
Рейд нәтижесінде Жымпиты-Орал бағытына жүретін 5 автокөлікке әкімшілік-құқық бұзушылық хаттама толтырылды. Оның ішінде 3-еуі - «Сырым» таксиі. 6 жолаушы тиеген автокөлік талапқа сай болмағандықтан, Орал қаласына жіберілмей, кері қайтарылды.
Шынар Молданиязова,
Сырым ауданы
zhaikpress.kz
