“Мәдениет – мәңгілік, өнер – өміршең” - демекші, Көздіғара топырағында туып-өсіп, ауданның мәдениет саласында өзіндік орнын алған, көптің есінде баянның құлағында ойнайтын қоңыр үнді марқұм Манарбек Сисеновке арналған шаралар тізбегі Сарой ауылында “Манарбек салған ән қандай?!” атты кешпен қорытындыланды.
Манарбек Сисеновтің ауылдастарынан бөлек, өнердегі іні-бауырлары, әріптестері арнайы келіп кештің көркін қыздырды.
Кештің шымылдығын өнердегі, өмірдегі қарындасы Айгүл Сисенова “Жан аға” әнімен түрсе, Ақтілек Пионеров, Гаухар Хусаинова, Мереке Сисенов, Марат Халиуллин, Еркегүл Өтенғалиевалар “Ауылым”, “Өзіңді аңсап”, “Көзің қайда?”, “Өмір-ай” деп әсем әнмен көрерменнің құлақ құрышын қандырса, Мерген Мұқанов, Армат Алдамжаров, Сәлімжан Әубәкіровтер дәстүрлі әндер орындады.
Манарбек Қожабергенұлының бауырлары “Жан бауырым” деп жүрек тебіренте ән шырқаса, Бекей Қанатов “Тұлғалар қайтып барады” әнімен кешті түйіндеді.
Өнердің “өз баласын” еске алып, әндерін сағынған ағайынға Манарбектің әкесі Қожаберген Сисенов отбасының, ағайын-туманың атынан кешке мұрындық болған жақсылар мен жайсаңдарға алғысын білдірді.
Айжан Амангелдина,
Сырым ауданы
Суреттерді түсірген: Сания Серимова
