Бүгін Сырым ауданында білім беру қызметкерлерінің дәстүрлі тамыз кеңесі өтті. Кеңес отырысына Сырым ауданының әкімі Төлеген Төреғалиев және білім беру ұйымдарының өкілдері қатысты.
2021 жылғы кеңес «Білімді ұрпақ – тұрақты дам кепілі» тақырыбын арқау етті. Секциялық жұмыстар 12-25 күндері аралығында Zoom платформасы арқылы өтіп, оған 210 педагог қатысқан.
Кеңестің негізгі баяндамасының мәтіні аудандық «Сырым елі» қоғамдық- саяси газетінің 2021 жылғы 27 тамыздағы №34 санында жарияланды.
Сырым аудандық білім беру бөлімінің басшысы Берік Жанболсынов бүгін әріптестерін жаңа оқу жылының басталуымен құттықтап, баяндамадағы тірек ақпараттарға ғана тоқталды.
Пленарлық мәжілісте Қособа мектеп балабақша-бөбекжай кешенінің директоры Жансұлтан Нұрмұханов «Болашақ» бағдарламасы және мектеп директоры: байланысы мен артықшылықтары» тақырыбында, Бұлдырты жалпы орта білім беретін мектебінің директоры Алмагүл Бисалиева «Білім беру процесінде қашықтан оқытудың ерекшеліктері» жөнінде, ал ата – аналардың бірі Тыныштық Ғаббасова «Қашықтан және дәстүрлі оқыту форматындағы ата-ана рөлі, белсенділігі, кездесетін кедергілер мен басымдықтар» тақырыбында баяндама жасады.
Кеңесте ауданның білім беру саласына сүбелі еңбек сіңірген 11 педагог ҚР Білім және Ғылым министрлігінің Құрмет грамотасымен, 3 педагог алғыс хатымен, 14 педагог облыстық білім басқармасының Құрмет грамотасымен марапатталды.
Сондай-ақ бірқатар педагогтарға Сырым ауданы әкімі Төлеген Төреғалиевтің және аудандық білім беру бөлімінің алғыс хаты берілді. Санитарлық жағдайға байланысты марапаттар мектептерге жолданды. Жиынды аудан басшысы қорытындылады.
Бауыржан Ширмединұлы,
Сырым ауданы
zhaikpress.kz
