Тасқала ауданының 90 жылдығы аталып өтті

Қазақ елінің батыс қақпасы саналатын Тасқала ауданының 90 жылдық мерейтойы жоғары деңгейде өтті. Деркөл өзенінің бойында қаз-қатар тігілген киіз үйлер алыстан мен мұндалап өзіне шақырғандай. Бейне бір ауыл маңына ауыл көшіп келген бе дерсің.

Таңғы сағат жетіден бастап қазан көтеріп, самаурынға шоқ салып, кәуәп пісірген адамдарды айтсаңызшы. Бұл күні дала қызықтарын тамашалауға еңбектеген баладан еңкейген кәріге дейін жиналды. Халықтың көптігі соншалық, бірін-бірі табу мүмкін болмады. Көп кешікпей салтанатты шара басталды.

Оған облыс әкімінің орынбасары Бақытжан Нарымбетов, «Жайық Пресс» ЖШС бас директоры Табылғали Сапаров, «Жайнай бер Тасқала» әнұранының авторы Ғайса-Ғали Сейтақ, жерлесіміз Бақтығали Ахметов пен аудан әкімі Бауыржан Айтмағамбетов және осы ауданда қызмет еткен біраз тұлғалар қатысты. Шара аудан көркемөнерпаздарының театрландырылған көрінісімен ашылды.

Тамырын тереңге жайған 90 жылдық тарихы бар Тасқала ауданы – бүгінде облысымыздағы алдыңғы қатарлы аудандардың бірі. Төрт түлігін түлетіп, егістігін жайқалтып, шаруасын өрге жүргізіп отырған мамыражай халқымыздың қайнаған еңбегінің арқасында өндіріс пен өркениет қатар дамуда.

Төл тарихымыздың еншісінде Тасқаланың адамзат тарихының бастапқы кезеңі тас дәуірінен бастап, еңселі Ешкітаудың етегі адам баласына құтты қоныс болған мекен екені белгілі.

Салтанатты жиында аудан әкімі Бауыржан Айтмағамбетов пен облыс әкімінің орынбасары Бақытжан Хаберұлы сөз алып, аудан жұртшылығын айтулы мерекемен құттықтады.

«Қымбатты тасқалалықтар! Тасқала ауданының 90 жылдық мерейтойы құтты болсын! Азаттығымыз бен егемендігіміздің арқасында жоғалғанымыз табылды, өшкеніміз қайта жанды. Біз еш уақытта да тарихымызды ұмытпауымыз керек. Оны өскелең ұрпақтың бойына сіңіру – біздің басты мақсатымыз. Тасқала ауданының облыс дамуына қосқан үлесі ерекше. Бұл өңір талай дүлдүлдер мен еңбек адамдарын шығарған қасиетті мекен. Бұл мекенде қызмет етіп, осы жерден түлеп ұшқан талай азаматтар қазіргі таңда елдің түкпір-түкпірінде еңбек етуде. Баршаңызды бүгінгі айтулы мерекемен құттықтаймын. Отбасыларыңызға амандық тілеймін. Тасқала жайнай берсін!», - деді облыс әкімінің орынбасары өз сөзінде.

Одан кейін ауданның гүлденіп-дамуына саналы ғұмырын арнаған, ел үшін аянбай еңбек еткен бірнеше азаматқа «Тасқала ауданының құрметті азаматы» атағы берілді. Олардың қатарында қарапайым еңбек адамынан аудан әкімі дәрежесіне дейін көтерілген, жерлесіміз «Батыс Қазақстан электр энергиясы» компаниясының бас директоры Қуат Мусин, атақты марафоншы, жерлесіміз, талай бәсі биік жарыстарда аудан атын шығарып жүрген Ғариф Сатиев, мемлекеттік қызмет саласының ардагері, әлеуметтік саланың білгір маманы Раушан Мүсәлімова, 2013-2018 жылдар аралығында Тасқала ауданының әкімі болған Санжар Әлиев бар.

Бұл күні Тасқаланың түлеуіне, тұғырының биіктеуіне барынша қызмет етіп, үлес қосқан  еңбек ардагері Мүтиғолла Ирменов, құқық қорғау саласының ардагері Бисенбай Өтегенов, белгілі кәсіпкер, «Нефтек» ЖШС бас директоры Асылбек Нупов, облыстық мәслихаттың депутаты, іскер басшы Нұртай Жұмашев пен әлем чемпионы, белгілі атбегі Бауыржан Мамбетовке құрмет грамотасы тапсырылды.

Одан әрі ауданның қалыптасуы мен дамуына сіңірген ерекше еңбегі, туған жерге деген мінсіз адалдығы үшін медицина саласының ардагері Бақтығали Ахметов пен «Жайық Пресс» ЖШС бас директоры, Тасқала қауымдастығының басшысы Табылғали Сапаровқа, аудандық ардагерлер кеңесінің төрағасы Жәрдемғали Балыков пен БҚО құрылыс материалдары корпарациясының басшы, белгілі меценат Мұхаметжан Кенжеғұловқа «Тасқала ауданының құрылғанына 90 жыл» мерейтойлық төсбелгісі табысталды.

Сондай-ақ, мерейлі тойға көршілес жатқан Бәйтерек, Казталов аудандарынан да қонақтар келіп, тасқалалықтарды айтулы мерекемен құттықтады.

Назгүл Серікқызы

zhaikpress.kz