Орал қаласында балғын футболшылар арасында «Қысқы Орал – 2021» турнирі өтті. Аталмыш доп додасында аудан намысын Подстепный қазақ мектебінің 2009-2010 жылы дүниеге келген футболшылары қорғап, тым жақсы нәтиже көрсетті.
Турнирге облыс бойынша 9 команда қатысып, олар үш топқа бөлінді. Теректілік балғындар өз топтарында қарсылас шақ келтірмей, жартылай финалға еш қиналмай өтіпті.
- Алдымен, «Санлин» командасын тобымызда 13:1 есебімен тас-талқан етіп ұттық. Одан кейін «Футлайф» командасымен кездесіп, есеп біздің пайдамызға 8:3 болып аяқталды. Әр топтан бірінші орын алған команда өзара кездесетін болды. Түрлі халықаралық турнирлерде бақ сынап, үздік болып жүрген «Футбол-кидз» командасымен жолықтық. Тартысты өткен ойында шәкірттерім 4:3 есебімен жеңіп, аудан намысын лайықты қорғай білді деп айта аламын, - дейді Подстепный қазақ мектебінің дене шынықтыру пәнінің мұғалімі Қажет Джалитов.
Финалда теректілік балғындар «Ақжайық» футбол клубының түлектерімен ойнап, өкінішке орай 2:1 есебімен жеңіліс тауыпты. Бірақ, аталмыш турнирдің күміс жүлдегерлері атанып, тұғырдың екінші сатысына жайғасты. Облыстық деңгейде жасындай жарқылдап, теңбіл допты ұршықша үйірген балғындардың болашағына сеніммен қараймыз.
Әділет Әлібек,
Теректі ауданы
zhaikpress.kz
