Жыл басы — Наурыз мейрамы шалғайдағы Болашақ ауылдық округінде тойланды. Ауылдағы орталық алаңда мерекелік сахна, киіз үй, алтыбақан құрылып, наурыз көже мен бауырсақтың тәтті иісі бұрқырады.
Алаңға жиналған халықтың қарасы қалың. Қыстан аман шыққан ауылдастар бір-бірімен құшақтасып көрісіп, ақ тілектерін жаудыруда.
Көпшілік жиналған тойға округтің Жаңатаң, Көпкүтір, Аққурай елді мекендерінің тұрғындары да асыға жетіп, мерекеге атсалысты.
Тойға жиналған округ тұрғындарын округ әкімі Аманжол Қажығалиев құттықтаса, ауылдың батагөй ақсақалдары елдің амандығын тілеп, бата берді. Әжелер ырыс пен берекеге толы мейрамды әспеттеп, шашу шашты. Әр жерден қазан көтеріліп, қуырдақ, палау, кәуәп қуырған қазан-ошақтардың түтіндері аспанға түзу ұшты.
Мерекеге жиналған ағайын киіз үйден дәм татып, ұлттық спорттық ойындарды тамашалады.
Алаңда мықтыларды анықтаған аударыспақ, арқан тарту, қой, қозы көтеру, ләңгі тебу, білек сынасу секілді ұлттық ойындар оздырылды.
Халықты біріктірген Наурыз тойы ауыл көркемөнерпаздарының мерекелік концертімен айшықталды.
Қайрат Жақып,
Казталов ауданы
zhaikpress.kz
