Тасқалада «Жасыл ел» жастар еңбек жасағы іске кірісті. Шараның ашылуына аудан әкімі Бауыржан Айтмағамбетов арнайы қатысып, жастарға сәттілік тіледі.
Аудандық жастармен жұмыс жөніндегі ресурстық орталығының басшысы Аман Байғалидың берген мәліметі бойынша, бұл жұмысқа биылғы жылы 16 мен 35 жас аралығындағы 120 жас тіркелген. Олар үш кезең бойынша жаз мезгілінің соңына дейін қоғамдық орындарды көгалдандыру және абаттандыру жұмыстарына қатысады.
Дәлірек айтсақ, ауданның тазалығын сақтап, оны көркейтуге қол ұшын береді. Аталмыш жұмысқа маусым айында 38, шілдеде - 57, ал тамызда 25 жас тартылған. Оларға арнайы киімдер берілді. Осылайша жастар жаз бойы бос жатпай, еңбек етіп өз нәпақаларын тапса, екінші жағынан ауданның гүлденуіне өз үлестерін қосады.
Назгүл Серікқызы,
Тасқала ауданы
zhaikpress.kz
