16 наурыз күні Казталов аудандық мәдениет үйінде ҚР Тәуелсіздігінің 30 жылдық мерейтойы және Наурыз мерекесіне орай жастарға отандық кино туынды «Томирис» көркем фильмі көрсетілді.
Көрерменге жол тартқанына біраз уақыт болған режиссер Ақан Сатаевтың тарихи туындысы аудан жастарына ерекше форматта ұсынылды. Кинотеатр дегенді қаладан ғана көретін ауыл жастарына ауданымыздың атқамінер азаматтары аудандық мәдениет үйінде фильмдер көрсетуді қолға алған болатын. Бүгінгі тарихи фильмнің ізін алдағы уақытта тағы бірқатар отандық фильмдер жалғап, көрермен назарына ұсынылмақ.
Бұл бастамаға жастар да дән риза.
Жансая Сатапова, А.Оразбаева орта жалпы білім беретін мектебінің 11-сынып оқушысы:
-Бүгінгі фильм маған өте ұнады. Ежелгі түркі, соның ішінде сақ тайпасының тарихымен танысқысы келетін адамдарға керемет туынды, есте қаларлықтай керемет кино. Фильмнің сюжеті тартымды, декорациялар, актерлардың ойнау шеберліктері, образдық киімдері бәрі-бәрі керемет. Режиссердің осындай туындыны қазақ жерінде түсіргеніне өте ризамын. Елімізде тарихи мән-мағынасы зор, тәрбиелік тағылымы мол фильмдер көптеп түсірілсе нұр үстіне нұр, - деді ол.
Көрсетілім санитарлық талаптарды сақтай отырып ұйымдастырылды.
Асылбек Нәсіпқали,
Казталов ауданы
zhaikpress.kz
