2021-2022 оқу жылы бойынша Орал қаласы мектептерінің «Мектепті басқарудағы инновациялық менеджмент» мониторингісінің қорытындысы жарияланды. Үздік ондыққа енген мектептердің басшылары кеше қала мектептері директорларының жиынында марапатталды.
Мониторингте 11 бағыт бойынша рейтинг жасалды. Оның ішінде оқушылардың білім сапасы, оқу озаттары, оқу екпінділерінің болуы, үлгермеушілердің төмен болуы, түлектердің «Алтын белгіге», «Ерекше аттестатқа» ұсынылуы, 9-сыныптар бойынша «Ерекше үлгідегі куәлік» иегерлері, 5-8 сынып оқушылары олимпиадасының қалалық, облыстық, республикалық кезеңдерінің жүлдегерлері, оқушылардың қалалық, облыстық, республикалық, халықаралық ғылыми жобалар, байқау, спорттық жарыс, интеллектуалдық сайыстардағы жетістіктері, мектеп ұжымындағы педагогтердің сапалық құрамы, педагогтердің қалалық, облыстық, республикалық, халықаралық байқаудағы, олимпиададағы табыстары, педагогтердің әдістемелік нұсқаулар, іс-тәжірибе таратуы назарға алынды. Рейтинг бойынша 6 номинант және 3 жүлделі орын, 1 бас жүлдегер анықталып, мектеп басшылары білім бөлімінің дипломы және ақшалай сертификатпен марапатталды.
Жақсы көрсеткіштері үшін М.Ықсанов атындағы №36 ЖОББМ директоры Азима Губашева, №16 ЖОББМ директоры Мария Кабакова, №19 ЖОББМ директоры Алтын Жұмағалиева, Д.Қонаев атындағы №44 мектеп-гимназиясының директоры Бибігүл Тлекенова, №20 ЖОББМ директоры Нұргүл Утегалиева, А.Тайманов атындағы №34 мектеп-гимназиясының директоры Елжас Кадыров марапатталып, 100 мың теңге сертификат иеленді.
Мониторинг қорытындысы бойынша ІІІ орынды №42 «Ақниет» мектеп-лицейі алып, директоры Ерік Темірғалиев білім бөлімінің дипломы және 150 мың теңге сертификатпен марапатталды. ІІ орын иеленген №41 мектеп-лицейі директорының міндетін атқарушы Алия Утебалиеваға білім бөлімінің дипломы және 200 мың теңге сертификат, І орын алған Ә.Молдағұлова атындағы №38 мектеп-лицейі директоры Шынар Сағынғалиеваға білім бөлімінің дипломы және 250 мың теңге сертификат табыс етілді.
Бас жүлдені №35 мектеп-лицейінің алды. Білім ұясының көшін бастаған мектеп-лицей директоры Леонид Черыкаевқа білім бөлімінің дипломы және 300 мың теңге сертификат ұсынылды.
Орал қаласы білім беру бөлімінің баспасөз қызметі
