Бүгін Орал қаласындағы «Отбасы» орталығында «Әйелдерге қатысты зорлық-зомбылыққа қарсы белсенді іс-қимылдың 16 күні» акциясына арналған іс-шараларды әзірлеу және өткізу бойынша қызметтік кездесу өтті. Акция әйелдерге қатысты зорлық-зомбылықты жою үшін халықаралық күрес күні, 25 қарашада басталады.
Кездесуге Орал қаласының жұмыспен қамту және әлеуметтік бағдарламалар бөлімінің Тұрмыстық зорлық-зомбылық құрбандарына арналған дағдарыс орталығы қызметкерлері, БҚО полиция департаментінің, Орал қаласының полиция басқармасының, БҚО әділет басқармасының, БҚО білім басқармасының, БҚО жастар ресурстық орталығының, «Аймақтық әйелдерді қолдау орталығы» ҚБ, «Білім қызметкерлерінің кәсіподағы» ҚБ өкілдері қатысты.
Кездесуге қатысушылар акцияға байланысты мәселелерді талқылады. Сонымен қатар зорлық-зомбылыққа қарсы 16 күн акциясының аясында іс-шаралар кешенін тиімді әзірлеуге және акцияны өткізу барысында барлық сала өкілдерінің белсенді қатысуына қатысты ұсыныстарын енгізді. Акция аясында тұрғындар арасында буклеттер, флайерлер мен ақпараттық парақтарды тарату арқылы әйелдерге қатысты зорлық-зомбылық мәселелері бойынша ақпараттық және ағартушылық қызмет жүргізу, сұрақтар мен пайдалы байланыстарды қамтыған онлайн сауалнамалар, флешмобтар өткізу, тұрмыстық зорлық-зомбылық құрбандарына білікті заңгерлік және психологиялық көмек көрсету, әлеуметтік роликтерді жариялау және тарату жоспарланған. Акция аясындағы іс-шаралар 2022 жылғы 25 қараша мен 10 желтоқсан аралығында өтеді.
Естеріңізге сала кетейік, 25 қараша – Әйелдерге қатысты зорлық-зомбылықты жою үшін халықаралық күрес күні. Бұл күнді БҰҰ Бас Ассамблеясы 1999 жылы ресми түрде жариялады. Осы күннен бастап бүкіл әлем бойынша әйелдерге қатысты зорлық-зомбылық мәселесіне назар аударуға бағытталған 16 белсенді күн басталады. Жыл сайынғы науқан 25 қарашадан 10 желтоқсанға дейін өтеді. Акция аясындағы іс-шаралар 2022 жылғы 25 қараша мен 10 желтоқсан аралығында өтеді.
Альфия Шамаева,
Суреттерді түсірген автор
zhaikpress.kz
