Жуырда Тасқала ауданына қарасты Ақтау ауылдық округінде ауыл азаматы, қажырлы еңбегімен, өнегелі ісімен, білім-білігімен, бүкіл адамгершілік асыл қасиетімен танылып, әрдайым халықтың аузында жүретін азаматтардың бірі, тәжірибелі спортшы болған Айғалиев Мақсот Сүндетқалиұлын еске алуға арналған волейболдан жарыс өтті.
Ашылу салтанаты Мемлекеттік Әнұранмен басталды. Жарысқа аудан әкімінің орынбасары Талғат Шакиров, Мақсот Сүндетқалиұлының әріптестері, ағасы Ақбай мен ардагерлер сөз сөйлеп қатысушыларға сәттілік тіледі. Замандастары Мақсот Айғалиевтің заман талабына сай жұмыс атқарғанын әсіресе мұғалімге сай жұмыс істеп, қажетті іс-қағаздарды толтыруда мұқият болғанын, балаларға зор сеніммен қарағаның қандай жетістік болсада бағалап, чемпион дайындап шығамын дейтінін, өз жұмысына жан-тәнімен беріліп атқарғаның атап өтті.
«Ол 1959 жылы 2 желтоқсанда Тасқала ауданыныңда дүниеге келді. Ақтау орта мектебін 1977 жылы бітірді. Содан соң, Орал қаласындағы техникалық колледжде оқып, кейін ауылшаруашылық университетін тәмамдап, техник болып жұмыс істеді. М.Өтемісұлы атындағы педагогикалық университетте оқыды. Ақтау мектебіне жұмыс істеп ерен еңбегімен көзге көрініп, «Сәулет» мектеп-лицейіне ауысып, сонда жұмыс атқарды. Жоғарғы санатты мұғалім болды. Дене шынықтыру сабағынан сабақ беріп қана қоймай, тоғызқұмалақ секілді әртүрлі спорттық ойындарды жетік білді. Өзінің еңбегінің арқасында әр түрлі алғысхаттар мен құрмет грамоталарын алды», - дейді қарындасы Гүлшара Айғалиева.
Аталмыш турнирде 10 команда бақ сынады. Турнир қорытындысы бойынша жүлде қоры 100 000 тенгені құрайтын 1 орынды Оян ауылының командасы қанжығаларына байласа, ал екінші орынды Тасқала ауылының командасы ұтып алды. Жүлде қоры - 50000 теңге. Жүлделі үшінші орынды Ақтау ауылының командасы (жүлде қоры 30000 теңге) иеленді. Жеңімпаздар кубоктармен, медальдармен және мадақтамалармен марапатталды.
Айта кету керек, ойындар тартысты өттіп, барлық қатысушылар жеңіске жетуге тырысты. Әуесқой спортшылар да өздерінің жақсы көрсеткіштерін көрсетті. Турнирдің сәтті өтуіне барша ауылдастары, әріптестері, шәкірттері бір адамдай атсалысты.
Гүлмира Мақанова,
Тасқала ауданы
zhaikpress.kz
