Қазақстан Республикасы Президенті Қасым-Жомарт Тоқаевтың жүктеген тапсырмасының бірі ауыл тұрғындарының әлеуметтік жағдайын жақсарту болатын. Бұл бағытта Тасқала ауданы көлемінде біраз жұмыс атқарылды. Соның бірі – өткен аптада Қосшы ауылдық округіне қарасты Кеңжайлау ауылына жеткізілген көгілдір отынның іске қосылуы. Аталмыш іс-шараға аудан әкімі Бауыржан Айтмағамбетов және сондай-ақ ауыл тұрғындары қатысты.
Айта кетейік, бұл жұмыстың іске асуына біраз адам атсалысты. Алдымен Оян ауылының тумасы, кәсіпкер Дәурен Нұрмағамбетовтің жетекшілігімен кооператив құрылып, тұрғындарға түсінік жұмысы жүргізілді. Одан әрі газ тарту жұмысына мердігер Ерлан Иманбаев басқаратын «IT Project Group» жауапкершілігі шектеулі серіктестігі ерекше үлес қосты.
Ауа райының қолайсыздығына қарамастан бір кісідей еңбек еткен жігіттерге ауыл тұрғындары да қолғабыс жасады. Ауылға жалпы ұзындығы 13 шақырым трасса тартылып, 14 үй мен бір мал қыстағы және демеушілердің көмегімен бір тұрғын үй көгілдір отынға қосылды. Салтанатты іс-шарада сөз алған Бауыржан Айтмағамбетов ел үшін істеліп жатқан игі істерді тілге тиек ете келіп, көгілдір отын өткізуге атсалысқан демеушілерге рақметін айтты. Осы жұмысты ұйымдастырған кәсіпкер Дәурен Қабдығалиұлы мен мердігер Ерлан Иманбаевқа алғыс хат табыс етті. Ауыл тұрғындары атынан Ерлан Есімұлының иығына шапан жапты. Көгілдір отын алауын жағу рәсімі Бауыржан Есқайырұлы мен ауыл тұрғыны, еңбек ардагері Ғилымғали Қалмурзинге ұсынылды.
Бұл күні ауыл көркемөнерпаздарының әуелете салған әндері мерекенің шырайын одан әрі аша түсті. Осылайша кішкентай ауыл үлкен қуанышқа бөленді.
Толқын Қалмурзина, ауыл тұрғыны:
– Ауылымызға көгілдір отын келіп, қуанып жатырмыз. Енді күл алып, от жағудан құтылдық. Бір сөзбен айтқанда, тұрмыстағы қиындықтың бәрі артта қалды. Бұл, әсіресе, өзім сияқты әйелдер үшін үлкен көмек. Бізге осындай жақсылық сыйлап, ауылға газ тартуға көмек қолын созған барша ел азаматына алғыстан басқа айтарымыз жоқ. Ауылымыз гүлдене берсін!
Талғат Тұралиев, ауыл тұрғыны:
– Бүгін кеңжайлаулықтар үшін үлкен қуаныш. Өзім Оянда тұрғаныммен, осы ауылдың тумасымын. Ауылға газ келіп, төбеміз көкке жетіп жатыр. Су бар, жаз шыға ауылдың үстінен өтетін күре жолға асфальт төселеді деген жақсы хабар жетті. Көгілдір отын да келіп жатыр. Ауыл халқы үшін осыдан басқа не керек? Қаладан еш кемі жоқ. Жағдайымыз жақсы. Тек ел тыныш, басымыз аман болсын!
Назгүл Серікқызы,
Тасқала ауданы
zhaikpress.kz
