Бәйтерек ауданы әкімдігінде аудандық мәслихаттың аппарат басшысы Тілекбай Төлепқалиевтің 60 жасқа толуына орай салтанатты шара өтті.
-Алпысты да алқымдап келіп қалған екенсіз, туған күніңізбен шын жүректен құттықтаймыз. Ең бастысы деніңіз сау, жақындарыңызбен аман болыңыз. Сізге қажымас қайрат, отбасыңызға бақ-береке тілеймін. Елдің құрметіне бөлене беріңіз, - деген аудан әкімі Марат Тоқжанов мерейгерге шапан жапты.
Сонымен қоса мемлекеттік қызметкерлердің бәрі қазақы нақышта киініп жүрсе деген ұсыныс-тілегі барын айтты. Өз кезегінде әріптестері де жылы лебіздерімен бөлісті.
Айта кетелік, Тілекбай Қажымұратұлы 1963 жылы 2 ақпанда Батыс Қазақстан облысы Ақжайық ауданы Есенсай ауылында дүниеге келген. 1986 жылы Батыс Қазақстан ауыл шаруашылығы институтын «зоотехника» мамандығы бойынша бітірген. 2010 жылы Батыс Қазақстан инженерлік-технологиялық университетін «қаржы» мамандығы бойынша бітірді. Әр жылдары Тайпақ ауданының Есенсай ауылдық округінің зоотехнигі, фермалар басқарушысы, әкімі қызметтерін атқарған.
2002-2012 жылдары Зеленов ауданының Железнов ауылдық округінің әкімі, Зеленов ауданының жұмыспен қамту және әлеуметтік бағдарламалар бөлімі бастығының орынбасары болып жұмыс істеді.
2012-2017 жылдары Зеленов ауданының әкімі аппаратының бөлім меңгерушісі, Зеленов ауданының жұмыспен қамту және әлеуметтік бағдарламалар бөлімінің басшысы болып қызмет етті.
2017-2020 жылдары "Nur Otan" партиясы Бәйтерек аудандық филиалы төрағасының бірінші орынбасары қызметін атқарды.
2020 жылдан бастап Бәйтерек ауданы әкімі аппаратының басшысы болып қызмет етіп келеді.
Әкімдіктің мәжіліс залында өткен салтанатты шарадан соң, мерейтой иесімен сұхбаттасқан болатынбыз. Ол өзінің қызығы мен шыжығы мол еңбек жолындағы кей сәтінен қалған естеліктерімен бөлісті. Бала кезде журналист болуды армандаған Тілекбай Төлепқалиев, қайтадан жастық шаққа оралуға мүмкіндік пен таңдау еркі берілсе, тағы да ойланбастан тура осы жолды таңдайтынын айтады.
Нұрсәуле Әбілпейсова,
Бәйтерек ауданы
zhaikpress.kz
