Жуырда Тасқала ауданы орталығындағы Қ.Сәтбаев атындағы жалпы орта білім беретін мектепте облыстық білім басқармасы білім беруді дамыту орталығы мен Тасқала ауданы білім беру бөлімінің бірлесе ұйымдастыруымен «Білім беру жүйесінде әлеуметтік-психологиялық қолдау қызметін ұйымдастыру» тақырыбында облыстық семинар-практикум өтті.
Семинар мақсаты білім алушыларға әлеуметтік-психологиялық қолдау қызметін айқындау және іс-тәжірибе алмасу.
Шара теориялық және шығармашылық бойынша екі бағытты қамтыды.
Білім беру ұйымдарының директордың тәрбие ісі жөніндегі орынбасарлары, педагог-психолог, әлеуметтік педагог мамандары қатысқан шарада алғашқы сөз кезегі аудандық білім беру бөлімінің басшысы Айгүл Қадырбайқызына беріліп, ауданымыздағы білім саласының әлеуеті, тәрбие жұмысының ұйымдастырылуына тоқталды.
Семинардың реті облыс орталығынан келген қонақтардың баяндамасымен жалғасты.
Сөз ретін облыстық білім басқармасы Білім беруді дамыту орталығының әдіскері Айман Раушанова бастап, білім беру ұйымдарында әлеуметтік-психологиялық қызметті ұйымдастыру бойынша әдістемелік ақпараттар айтса, облыстық полиция департаменті жергілікті полиция қызметі басқармасының инспекторы, полиция капитаны «Әлішер Өтегенов кәмелетке толмағандарға қатысты қылмыстың алдын алу үшін қабылданып жатқан іс-шаралар туралы түсіндірме жұмыстарын жүргізді.
Сонымен қосаәдістемелік көмек құрамының мүшелері Орал қаласындағы №46 жалпы орта білім беретін мектебінің педагог-психологі Айнагүл Хабиева мектептегі буллингті анықтау және алдын алу бойынша және №14 жалпы орта білім беретін мектебінің әлеуметтік педагогі Айжан Сағынайева жыныстық қол сұғушылықтың алдын алу бағытында әлеуметтік-психологиялық қолдау көрсету бойынша өзінің іс-тәжірибесімен бөлісті.
Теориялық бөлімінің соныңда ұсыныс пікірлер айтылып, мәселелер талқыланды. Сонымен қоса, облыс орталығынан келген әдістемелік көмек жекелей мектептер бойынша түсіндірме жұмыстарын жүргізіп, көмек көрсетті.
Меңдібек Нұрболатұлы,
Тасқала ауданы
zhaikpress.kz
