Жуырда Тасқала ауданы әкімдігінде Тасқала аудандық мәслихатының алғашқы сессиясы өтті. Оған аудан әкімі Бауыржан Айтмағамбетов, аудандық аумақтық сайлау комиссиясының төрағасы Асқар Нұрмақов пен аудан әкімінің орынбасарлары, сондай-ақ, VII-VIII шақырылымның депутаттары мен округ әкімдері және ауданның мекеме, бөлім басшылары, аудандық қоғамдық кеңестің мүшелері қатысты.
Жиынды ашқан аудандық сайлау комиссиясының төрағасы Асқар Ғабдрахимұлы жиналғандарды 19 наурызда өткен аудандық мәслихат депутаттарының сайлау нәтижелерімен таныстырып, аудандық мәслихаттың жаңа сайланған депутаттарына куәліктер мен төс белгілерін табыстады. Одан әрі аудандық мәслихат төрағасын сайлау жөніндегі мәселеге қатысты депутат Жанар Бисенғалиеваның кандидатурасы ұсынылып, ол бірауыздан қабылданды. Сөйтіп, Жанар Нұрболатқызы аудандық мәслихатының төрағасы болып сайланды.
Депутат Сары-Тау Аманбаев бюджет, экономика, инфрақұрылымды және кәсіпкерлікті дамыту жөніндегі тұрақты комиссияның төрағасы болып сайланып, оның құрамына депутат Есенмұрат Кучербаев, Мади Хайров, Орынбсар Утешев, Замир Сарсенбаев енгізілді. Білім, денсаулық сақтау, әлеуметтік, мәдениет және жастар саясаты, ұйымдастыру және құқықтық мәселелер жөніндегі тұрақты комиссия төрағасы болып Люция Жұбанышқалиева сайланды.
Аталмыш комиссия құрамына депутат Зульфия Сергазиева, Мақсат Оразбаев, Данияр Дүйсенгалиев, Азамат Кульшманов енгізілді. Сессия соңында аудан әкімі Бауыржан Айтмағамбетов сөз сөйлеп, ауқымды істердің ұйытқысы бола білген VII шақырылым депутаттарына рахметін айтып, алғыс хаттар табыс етті. Ал VIII шақырылым депутаттарына сәттілік тілеп, ел мүддесі үшін бірлесе еңбек етуге шақырды.
Одан басқа еңбек ардагері Раушан Мүсәлімова, Қосшы ауылдық округінің әкімі Сансызбай Рахимов, аудандық қоғамдық кеңестің төрағасы Ганмирлан Гусмановтар да игі тілектерін білдіріп, депутаттарға сәттілік тіледі.
Назгүл Серікқызы,
Тасқала ауданы
zhaikpress.kz
