Жуырда Орал шаһарындағы Оқушылар сарайында 8-11-сынып оқушылары арасында «Ел ертеңі –
білімді ұрпақ» облыстық пікірсайыс турнирі (ағылшын лигасы) өтті.
Өскелең ұрпақты отансүйгіштікке тәрбиелеу, оқушылардың шығармашылық қабілетін дамытуды мақсат еткен шараны облыстық білім басқармасы мен «Дарын» қосымша білім беру орталығы ұйымдастырды.
– Облыстық турнирге мектепішілік, аудандық, қалалық кезеңдерде жеңімпаз атанған дебат клубтарының көшбасшылары, барлығы – 9 фракция, 18 оқушы қатысты. Турнир америкалық парламенттік сипатта өтті. Бұл - парламенттік сипаттағы дәйектердің, тапқырлықтың және риторикалық қасиеттердің сайысы. Әрқайсысы екі ойыншыдан тұратын үш команда – Үкімет пен оппозиция ұсынған қарарды талқылады. Бұл сипаттағы дебаттың ерекшелігі, зерттеу мен дәлелдер жинауға емес, тез сыни ойлауға, логикалық ойлауға және сараптамалық талдауға негізделген. Пікірталас мәселелерінің негізгі тақырыбы – сыбайлас жемқорлыққа қарсы мәдениетті қалыптастыру, – деп атап өтті облыстық білім басқармасының бас маманы Баянгүл
Семғалиева.
Турнир қорытындысы бойынша А. Тайманов атындағы №34 мектеп бірінші, облыстық дарынды балаларға арналған мамандандырылған «Білім-инновация» мектеп-лицейі екінші, облыстық дарынды балаларға арналған мамандандырылған С. Сейфуллин атындағы №11 мектеп-лицей интернаты үшінші орындарды иеленді.
Ағылшын тіліндегі пікірсайыс облыстық деңгейде бірінші рет ұйымдастырылып отыр.
Гүлжамал Жолдығали
