Жуырда Белорусь Республикасында өткен ІІ Тәуелсіз Мемлекеттер Достастығы ойындарында жерлесіміз Алдияр Сайын дзюдодан 90 келі салмақ дәрежесінде қолаға ие болды.
Жасөспірімдер арасында өткен байрақты бәсекеде Алдияр Қайсарұлының қарқынды қимылына спортсүйер қауым риза болды. Алдияр бұл сайыста тағы бір тұғыр төріне көтерілді. Командалық белдесуде жүлделі екінші орын алып, ортақ жеңіске үлес қосты. Олимпиада резервінің облыстық мамандандырылған мектеп-интернат колледжі түлегінің алғашқы бапкері – өзінің әкесі Қайсар Құсайынов. Ал жеңісті күндерге жетелеген қазіргі бапкері Алтынбек Сұпығалиевтің де еңбегі ерен. Әке жолын қуған қайсар ұлдың бағындырар биігі әлі алда!
Н. Айқын,
Шыңғырлау ауданы
