Дзюдодан әлем чемпионы Нұрлан Исатаевты жүзден астам адам әуежайда қошемет көрсетіп қарсылап алды. Облыс әкімінің орынбасары Б.Нарымбетов чемпионды жеңісімен құттықтап, алдағы уақыттағы спорттық мансабына сәттілік тілей отырып, спортшының болашағынан үлкен үміт күтетіндігін жеткізді.
Спортшыға ақтан дәм татқызып, өнерпаздар ән арнады. Қарсылауға келген Жайық жастары және спорт жанашырлары, мемлекеттік қызметкерлер мен спортшылар Нұрланды жүлдесімен құттықтап, естелікке суретке түсті.
Ағымдағы жылдың 23-27 тамыз күндері Хорватия елінің астанасы Загреб қаласында өткен кадеттер арасындағы әлем чемпионатында 55 келі салмақта бақ сынаған Батыс Қазақстан облысының спортшысы Нұрлан Исатаев алтын медаль еншілеген болатын Нұрлан алғашқы белдесуінде Түркіменстан балуанын ваза аримен жеңіп, екінші белдесуінде Армения балуанын да ваза аримен басым түсті. Ширек финалда АҚШ балуанын иппонмен қапы қалдырды. Жартылай финалда тағы бір қазақстандық балуан Оралбек Байзақты жеңіп финалға шықты. Финалда Гүржі балуанын жеңіп әлем чемпионы атанды.
Алтынбек Сұпығалиев,
жаттықтырушысы
