Республика күні қарсаңында Орал–Желаев тасжолының бойында «Diplomat» қонақүйі ашылды.
Отандық туризмді дамытудың инвестициялық жобасы аясында салынған нысан 25 адамды тұрақты жұмыспен қамтымақ. Кешеннің ашылу салтанатына Орал қаласының әкімі Мұрат Байменов, облыстық және қалалық мәслихаттардың депутаттары, кәсіпкерлер қатысты.
– Кейінгі жылдары Орал қаласының көшелері көркейіп, жарықтандыру ретке келтіріліп, шаһар қанат жайып келеді. Жаңа ғимараттар салынып, туризм саласы дамуда. Сәні мен сәулеті жарасқан бұл қонақүй еліміздің түкпір-түкпірінен, алыс-жақын шетелден келетін қонақтарға, туристерге сапалы қызмет көрсетеді деп сенемін. Өңір туризмінің дамуына үлес қосып, тұрақты жұмыс орындарын ашып отырған Элгун Джаналиевке алғысымды білдіремін. Кәсібі өркендей берсін, – деді шаһар әкімі Мұрат Болатұлы.
Сонымен қатар «Бірлік» әзербайжан мәдени-ағарту қоғамы» ҚБ төрағасы Наджаф Мамедов кәсіпкердің қуанышына ортақтасқан барша қонаққа ризашылығын айтты. Салтанатты ашылуды тамашалаған үлкен-кіші ел игілігіне берілген нысанды аралап көрді.
Орал қаласының жас кәсіпкерлері Элгун мен Эльвин Джаналиевтер – қайырымдылықпен айналысатын жас меценаттар. Олар – Қазақстан халқы ассамблеясының белсенді мүшелері. Қонақүй иесі Элгун Ахмедоглудың айтуынша, нысанның құрылысына жергілікті 50 жұмысшы жұмылдырылған.
Сонымен бірге осы өңірдегі тауар өндірушілердің құрылыс материалдары пайдаланылып, жиһаздары сатып алынған. Жоба құны – 300 млн теңге. Қонақүй кешеніндегі 31 бөлменің 9-ы біркісілік болса, қалғандары – екікісілік. Кәсіпкер болашақта мұнда келген қонақтардың игілігі үшін кофехана және ойын-сауық орнын ашуды жоспарлап отыр.
Айна Имашева
zhaikpress.kz
